फेरि बढ्यो सार्वजनिक यातायातको भाडाः धादिङबेशी–काठमाडौंको भाडा कति?(सूचीसहित)

धादिङ,०७ भदौ।
बागमती प्रदेशमा चल्ने सार्वजनिक यातायातको भाडा फेरि बढेको छ।

बागमती प्रदेशको श्रम, रोजगार तथा यातायात मन्त्रालयले नयाँ भाडा दर सार्वजनिक गरेको छ ।मन्त्रालयले आजैदेखि लागू हुने गरी सार्वजनिक सवारीको भाडादर समायोजन गरेसँगै धादिङसहित बागमती प्रदेश भित्र चल्ने सार्वजनिक सवारीको भाडा बढेको छ।

यात्रुवाहक सवारी साधनमा नयाँ भाडादर अनुसार अब ५ किलोमिटरसम्मको १८ रुपैयाँबाट वृद्धि भएर १९ रुपैयाँ कायम गरिएको छ ।

त्यस्तै, १० किलोमिटरको २४ रुपैयाँबाट वृद्धि भएर २६ रुपैयाँ , १५ किलोमिटरसम्मको २९ बाट वृद्धि भएर ३१ रुपैयाँ नयाँ भाडा दर तोकिएको छ ।

२० किलोमिटरसम्मको ३२ बाट वृद्धि भएर ३५ रुपैयाँ र २० किलोमिटरभन्दा माथि ३७ रुपैयाँबाट बढाएर ४० रुपैयाँ नयाँ भाडादर तोकिएको छ ।

बढेको भाडा अनुसार अब धादिङबेशी–काठमाडौंको भाडा २६६ कायम भएको छ ।८७ किलोमिटर दुरी रहेको धादिङबेशी–काठमाडौंको भाडा यसअघि २०८० साउन ११ गतेयता २५३ थियो ।

काठमाडौं–गल्छीको भाडा १४३ कायम भएको छ । यसैगरी धादिङबेशी–नारायणगढको भाडा ३०६ कायम भएको छ । ९७ किमि दुरी रहेको धादिङबेशी–नारायणगढको भाडा यसअघि २०८० साउन ११ गतेयता २९१ थियो ।

बागमती प्रदेशमा सञ्चालनमा रहेका ट्याक्सिहरुको भाडादर पनि कायम गरिएको छ ।जहाँ फ्याग डाउनको ५२ रुपैयाँ कायम गरेको छ ।

अब ट्याक्सिहरुको २०० मिटरको भाडादर १० रुपैयाँबाट १० रुपैयाँ ३४ पैसा तोकिएको छ । नेपाल आयल निगमले गत मङ्गलवार पेट्रोलमा प्रतिलिटर पाँच रुपैयाँ र डिजल तथा मट्टीतेलमा प्रतिलिटर १४ रुपैयाँ बढाएको थियो ।

यसअघि निगमले स्वाचालित मूल्य प्रणाली लागू गरेपछि श्रम रोजगार तथा यातायात मन्त्रालयले साउन ११ गते घाडा घटाएको थियो । अब पेट्रोलियम पदार्थको मूल्य ५ प्रतिशतभन्दा माथि थप घटभएपछि मूल्य समायोजन हुने छ ।
अन्य कुन रुटको कति हेर्नुहोस् ?