ज्वालामुखीमा दोस्रो चरणको बजार अनुगमन सुरु,म्याद नाघेका खाद्य सामग्री जफत

धादिङ । ज्वालामुखी गाउँपालिकामा आजदेखि दोस्रो चरणको बजार अनुगमन सुरु भएको छ ।

बजार अनुगमन समितिका संयोजक सुजन श्रेष्ठ, अनुगमन समितिका सदस्यहरु,सुरक्षाकर्मी र संचारकर्मी लगायतको टोलीले पालिकाको वडा नम्बर २ र ५ का बजार क्षेत्रहरुबाट दोस्रो चरणको अनुगमन थालेको हो ।

 गाउँपालिका भित्र भित्रिने खाद्य वस्तुहरुको गुणस्तर,परिमाण र त्यसले सेवाग्राहीमा पार्ने प्रभावहरुलाई अनुकुल बनाउनुका साथै अखाद्य वस्तुहरुको उपभोगलाई निरुत्साहित गर्नको लागि पालिकाले बजार अनुगमनलाई तीव्र बनाएको अनुगमन समितिका संयोजक सुजन श्रेष्ठले जानकारी दिनुभयो ।

आज अनुगमनको क्रममा खाद्यन्न तथा किराना पसल, होटल, फेन्सी पसल, तरकारी, फलफूल, मासु, मिठाई पसल, डेरी फार्मेसिहरुको दर्ता, नविकरण, गुणस्तर, आपूर्ति, मुल्य, नापतौलको परिक्षण गर्नुका साथै म्याद नाघेका खाद्य सामग्री जफत गरिएको श्रेष्ठले बताउनुभयो।

साथै मूल्य सूची, साइनबोर्ड, व्यवसायदर्ता तथा नविकरण लगायतका नियमहरु पुरा नगरेका पसलहरुलाई तत्काल पालिकामा उपस्थित भई निर्देशन पालना गर्न आग्रह समेत गरिएको उहाँको भनाई छ।