बेनिघाट रोराङमा शिक्षामा पहुँच सुनिश्चितता परियोजना लागु,विद्यालयमा बालमैत्री सिकाइको वातावरण बन्ने बिश्वास

अडियोमा सुन्नुहोस

धादिङको बेनिघाट रोराङ गाउँपालिकामा शिक्षामा पहुँच सुनिश्चितता परियोजना लागु भएको छ।

प्रयत्नशील सामुदायिक विकास समाज(प्रयास नेपाल)को आयोजना तथा चाईल्ड फण्ड जापानको साझेदारी र बेनिघाट रोराङ गाउँपालिकाको समन्वयमा गाँउपालिकाको वडा नं ६, ८ र १० मा परियोजना लागु गरिएको प्रयास नेपालका कार्यकारी निर्देशक दामोदर अर्यालले बताउनुभयो ।

बालबालिकाको समग्र शैक्षिक गुणस्तर सुधार तथा परिवार र समुदायको आय बृद्घिका अबसरहरुमा समेत सुधार गर्ने उद्धेश्यसहित यो परियोजना सुरुवाती चरण सन् २०२१ देखि २०२२ सम्म ९ महिना वडा नं ६, ८ र १० वडाका १९ बिद्यालयहरु कार्यान्वयनमा रहेको र अब यिनै कार्यक्षेत्रमा केन्द्रित रहेर ५बर्ष काम गर्ने गरी परियोजना तयार भएको अर्यालले बताउनुभयो ।

परियोजनाको बिषयमा मंगलबार विशालटारस्थित गाउँपालिका कार्यालयमा गाउँपालिका स्तरीय अभिमुखीकरण कार्यक्रम गरिएको छ।

प्रयास नेपालका अध्यक्ष विर बहादुर श्रेष्ठको अध्यक्षतामा भएको कार्यक्रममा गाउँपालिकाका अध्यक्ष कृष्ण बहादुर थपलिया(विवेक)को प्रमुख आतिथ्यता तथा जिल्ला समन्वय अधिकारी चेतनाथ अर्याल, प्रशासकिय अधिकृत नर्बदा घिमिरे, वडा नं ६ का वडाध्यक्ष टेकनाथ सिलवाल, वडा नं ८ का वडाध्यक्ष राज कुमार श्रेष्ठ, वडा नं १० का वडाध्यक्ष विकास चेपाङ, शिक्षा अधिकृत बोधराज पाठक, बिभिन्न शाखाका प्रमुख एवम प्रतिनिधी, वडासदस्यहरु लगाएतको आतिथ्यता रहेको थियो ।

कार्यक्रमलाई सम्बोधन गर्दै गाउँपालिकाका अध्यक्ष थपलियाले परियोजना मार्फत बेनिघाट रोराङको शिक्षा क्षेत्रमा धेरै सुधार हुने बताउनुभएको छ ।

पालिकाले शिक्षा र कृषि क्षेत्रलाई विशेष महत्व दिएर अगाडी बढाएको बताउदै पालिकाको तर्फबाट यस परियोजना संचालनको लागि निरन्तर सहयोग गर्ने बताउनुभयो ।

अन्तरक्रिया कार्यक्रममा सहभागिहरुले बेनिघाटमा सयौं बालबालिकाहरु शिक्षाबाट वञ्चित हुने अवस्थामा पुगेको हुनाले समान रुपमा शिक्षा प्रदान गर्ने गरि परियोजना संचालन गर्न आग्रह गरेका थिए ।

परियोजनाको बारेमा जानकारी गराउदै प्रयास नेपालका परियोजना प्रबन्धक केशव सिग्देलले अप्रिल २०२३ देखी मार्च २०२८ सम्म अवधी रहने परियोजनाले शिक्षा,बाल संरक्षण तथा विपद जोखिम न्युनिकरण मुख्य क्षेत्र बनाएर काम गर्ने बताउनुभयो ।

परियोजनाबाट बालविकास देखी कक्षा १२ सम्मका २ हजार ६४ बालबालिका, तिन वडाका १ हजार २९९ चेपाङ र दलित परिवार,१९ विद्यालयका शिक्षक,विद्यालय व्यवस्थापन समिति र शिक्षक अभिभावक संघका प्रतिनिधि गरी ११ हजार ५७३ प्रत्यक्ष लाभान्वित हुने परियोजना प्रबन्धक सिग्देलले बताउनुभयो ।

परियोजना लागु भएका सम्पुर्ण विद्यालयहरुमा बालमैत्री सिकाइ वातावरण हुने, बालबालिकालाई परिवार तथा समुदायमा बालमैत्री सिकाइ वातावरण उपलब्ध हुने, विद्यालयले विपद् जोखिम न्यूनिकरणका उपायहरु लागु गरेका हुने र विद्यालयको सुशासन सुदृढ हुने उहाँको भनाई छ ।