धादिङमा थपिए २३ जना डेंगुका नयाँ बिरामी

अडियोमा सुन्नुहोस

धादिङ,१० कात्तिक।
पछिल्लो २४ घण्टामा धादिङका २३ जनामा डेंगु संक्रमण पुष्टि भएको छ । १२ जना पुरुष र ११ जना महिला गरी कुल २३ जना डेंगुका नयाँ बिरामी थपिएको स्वास्थ्य कार्यालय धादिङले जनाएको छ। यो सँगै जिल्लामा कुल संक्रमित १ हजार ८३५ पुगेको छ।

योसँगै हालसम्म जिल्लाका ९९८ जना पुरुष र ८३७ महिला गरी कुल १ हजार ८३५ जनामा संक्रमण पुष्टि भएको स्वास्थ्य कार्यालयको विवरणमा उल्लेख गरिएको छ । जिल्लाको कुल संक्रमितमध्ये आधा भन्दा बढि संक्रमित नीलकण्ठ नगरपालिकामा रहेका छन् ।

नगरपालिकामा हालसम्म १ हजार १४७ जना संक्रमित भएका छन् भने गजुरीमा १०६, धुनिबेशीमा ८७, गल्छीमा ८३,त्रिपुरासुन्दरीमा ७२ जनामा संक्रमण भएको छ।

यस्तै ज्वालामुखीमा ७३, सिद्धलेकमा ४३, बेनिघाट रोराङमा ३९, गंगाजमुनामा २७, थाक्रेमा १७,नेत्रावती डवजोङमा १२ , रुवीभ्यालीमा १२ र खनियाबास गाउँपालिकामा ७ जनामा संक्रमण पुष्टि भएको छ ।

जिल्लाको कुल संक्रमित मध्ये १०२ जनाको ठेगाना खुलेको छैन भने ८ जना अन्य जिल्लामा परिक्षण गरिएको स्वास्थ्य कार्यालयको विवरणमा उल्लेख गरिएको छ ।