गजुरी चेपाङटारी पहिरो पीडितको गुनासोःसबै दल भोट माग्न आए,आश्वासन दिए तर बस्ने ठाउँ दिएनन्

धादिङ,१३ जेठ ।
धादिङको गजुरी गाउँपालिका २ चामबास चेपाङटारीका २१ पहिरो पीडित विगत ५ वर्षदेखि टेण्टमा बस्न बाध्य छन् ।

२०७५ सालमा गाउँ धाँजा फाटेर बस्न नहुने अवस्था आयो । २०७६ साउनमा परेको अबिरल वर्षाका कारण जमिन नै भासिएपछि बस्ती नै जोखिमपूर्ण भयो। सरोकालवालाबाट आश्वासन पाए तर राहत तथा क्षतिपूर्ति भने पाएनन् ।

राज्यको तर्फबाट केही नपाएपछी पीडितहरु आक्रोशित भएका छन् ।२१ घर परिवारका ९२ जना पहिरो क्षेत्रबाट विस्थापित भएर नजिकै अर्काको जग्गा भाडामा लिएर बस्न बाध्य भएको र हालसम्म पनि अलपत्र अवस्थामा रहेको पहिरो विस्थापित बिरबहादुर लामाले बताउनुभयो ।

पृथ्वीराजमार्गबाट ३ सय मिटरको दुरीमा विगत ५ वर्षदेखि टेण्ट हालेर बसिरहेको विस्थापित तामाङबस्तीमा चुनावका बेला भोट माग्नेहरुको लर्को नै लागेको थियो ।

सबै दल र पार्टी भोट माग्न आए,उनिहरुले भोट खाए हामीलाई आश्वासन दिए तर बस्ने ठाउँ दिन्छु भनेर दिएनन्,भक्कानो फुटेर रुँदै विस्थापित सानुमाया तामाङले बताउनुभयो ।

दैनिक ज्यालादारीमा निर्वाह गर्ने मानिसहरु विस्थापित हुदाँ महिला तथा वालवालिका अझै प्रभावित भएको देखिन्छ । दैनिकजसो आउने हावाहुरीबाट बच्नका लागि टेन्ट समातेर बस्नु पर्ने अवस्था आएको छ । पाँचवर्षदेखि पेटभरी खान नपाएर बालबालिकामा समेत असर परेको खाद्य अधिकार समूहका संयोजक पंचमाया तामाङले बताउनुभयो ।

विस्थापित भएका कारण आर्थिक, समाजिक र सांस्कृतिक अवस्था खलवलिएको छ । आफ्नो जग्गा जमिनबाट उत्पादन भएका खाद्यन्नले एक महिना पनि खान मुस्किल छ । ज्याला मजदुरी गरेर जीविका चलाउनुको विकल्प छैन । विस्थापित जीवन सवै भन्दा पिडादायी हुने गरेको सानुमायाले रुँदै पत्रकारहरुलाई बताउनुभयो।

यहाँका जनताको लागातार भोट जितेर मन्त्रीहरु भए । प्रदेश सरकारमा मुख्यमन्त्रीहरु पनि भए । स्थानीय सरकारमा गाउँपालिका अध्यक्ष र वडा अध्यक्षहरु समेत बस्तीमा भोट खाए तर आफुहरुको माग पुरा गर्छु भनेर पनि नगरेपछि गाउँबासी नै आक्रोशित भएका छन् । भोटचाँही खाने, काम किन नगर्ने ? उनिहरुले आफ्नो माग सुनाउन धादिङबेसीमा पत्रकारहरुलाई भेटे ।

आफ्नो आवाज सुनाइ दिन आग्रह गरे ।गजुरी गाउँपालिकाले मासिक ३ हजारका दरले घरभाडा दिने गरेको छ । यसको सट्टा बस्ने बास दिलाउन विस्थापितहरुले मुख्यमन्त्रीको कार्यालयमा पुगेर मुख्यमन्त्री शालिकराम जम्कट्टेल, गाउँपालिका अध्यक्ष गणेशलाल श्रेष्ठलाई समेत ज्ञापनपत्र बुझाइसकेका छन् ।

गाउँमा खाद्य अधिकार समूहमा आवद्ध भएका उनिहरुले समस्या समाधानका लागि पहल गर्न हिजो शुक्रबार प्रमुख जिल्ला अधिकारीलाई ज्ञापन पत्र बुझाउन जिल्ला प्रशासन कार्यालय पुगे ।

प्रमुख जिल्ला अधिकारी भेटघाटमा व्यस्त हुनुहुन्थ्यो । सुकिला लुगा लगाएकाहरुको भेटघाट सकिएपछि प्रमुख जिल्ला अधिकारी आफु व्यस्त भएको भन्दै कार्यालयबाट क्वाटरतिर बाहिरिए ।

आफ्नो माग राख्न आएका विस्थापित परिवारले सहायक प्रमुख जिल्ला अधिकारी हरि प्रसाद अधिकारीलाई ज्ञापनपत्र बुझाएका छन् ।१० महिना अघि गजुरी गाउँपालिकामा पीडित परिवार, प्रदेश सरकार समेतको सहभागितामा बैठक भएको थियो ।

गाँउपालिकाले जग्गा व्यवस्था गर्ने प्रदेश सरकारले जग्गा व्यवस्था गरेको पत्र मुख्यमन्त्री कार्यालयमा पठाएको १५ दिन भित्र आवास निर्माण गर्न बजेट उपलब्ध गराउने सहमति भएको थियो ।

हालसम्म पनि काम नभएको र वर्षा सुरु हुन थालेपछि पीडितहरु मुख्यमन्त्री र प्रमुख जिल्ला अधिकारीलाई बस्ती स्थानान्तरण गर्न दौडधुप गरिरहेका छन् ।