गल्छी हत्याकाण्डका तीनजना आरोपी कारागार चलान

धादिङ,२५ जेठ ।
धादिङको गल्छी गाउँपालिका ८ कटलपौवाका विनोद थापा मगरको हत्यामा संलग्न तिन आरोपीहरूलाई कारागार चलान गरिएको छ।

जिल्ला अदालतको जेठ २४ गतेको थुनछेक आदेशले घटनामा संलग्न गल्छी गाउँपालिका ८ की ४७ वर्षिया सरस्वती पनेरु(पण्डित), उनको छोरा २६ वर्षिय निरज पण्डित र पाल्पाको तानसेन नगरपालिका १४ घर भई हाल गल्छी ८ बस्ने ३० वर्षिय किरन रानालाई पुर्पक्षको लागि कारागार चलान गरिएको जिल्ला प्रहरी कार्यालय धादिङका प्रवक्ता एवम् सूचना अधिकारी प्रहरी नायव उपरीक्षक सन्तुलालप्रसाद जैसवारले जानकारी दिनुभयो ।

गत वैशाख २७ गते निवुवाबोटेमा सरस्वती पण्डितले सञ्चालन गरेको सानदार होटल एण्ड लजमा खाजा खाएको पैसाको विषयमा विवाद हुँदा २७ वर्षीय मगरमाथि छुरी प्रहार गरी हत्या भएको थियो ।

आरोपी तिनै जनालाई कर्तव्य ज्यान मुद्दा र होटलका सञ्चालक समेत रहेकी पनेरुमाथि केटीहरुलाई डर,त्रास र प्रलोभनमा पारी वेश्यावृद्धिमा लगाई मानव वेचविखन गरेकोे कसुर समेत लागेको प्रहरीले जनाएको छ ।