नीलकण्ठ बालमन्दिर माविको स्वर्ण महोत्सव : भोलि पूर्व उपप्रधानमन्त्री खड्का आउने (भिडियोसहित)

धादिङ । सदरमुकाममा धादिङबेसीमा रहेको नीलकण्ठ बालमन्दिर माध्यमिक विद्यालयले स्वर्ण महोत्सव मनाइरहेको छ।

नीलकण्ठ-३ को बालमन्दिर मा.वि. नीलकण्ठ मा.वि र इजारा आ. वि. समायोजन गरि बनेको एकीकृत विद्यालय नीलकण्ठ बालमन्दिरले २०३१ साल जेठ १९ गते तत्कालीन नीलकण्ठ विद्यालय स्थापना भएको दिनलाई स्थापना दिवस मानी एकीकृत विद्यालय स्थापना र संचालनको ५० वर्ष पुगेको उपलक्ष्यमा विविध कार्यक्रमसहित स्वर्ण महोत्सव मनाईरहेको छ ।

स्वर्ण महोत्सवको उद्घाटन पूर्व उपप्रधान एवं रक्षामन्त्री पूर्ण बहादुर खड्काले गर्ने विद्यालय व्यवस्थापन समिति अध्यक्ष दिपक कोईरालाले जानकारी दिनुभयो ।

अध्यक्ष कोईरालाले बिहिबार विद्यालयमा पत्रकार सम्मेलन गरी भोलि शनिबार पूर्व उपप्रधानमन्त्री खड्काको प्रमुख आतिथ्यतामा स्वर्ण महोत्सव मूल समारोह आयोजना हुने जानकारी दिनुभएको हो ।

विद्यालयको स्वर्ण महोत्सवका उपलक्ष्यमा जेठ १६ गते धादिङ जिल्ला स्तरीय अन्तरविद्यालय हाजिरी जबाफ प्रतियोगिता, १७ गते विद्यालयको अन्तरसदनात्मक नृत्य प्रतियोगिता सम्पन्न भएको र आज विशेष सांस्कृतिक झाँकी सहित धादिङवेसी बजारमा शिक्षक विद्यार्थीहरुको र्‍याली आयोजना गरिएको पत्रकार सम्मेलनमा कोईरालले बताउनुभयो ।

उहाँले स्वर्ण महोत्सव मूल समारोहमा सहभागी भई भव्यताका साथ सम्पन्न गर्न आग्रह गर्नुभएको छ ।

बालमन्दिर,नीलकण्ठ र इजारा आ. वि. समायोजन गरि बनेको एकीकृत विद्यालयको नियमित एकीकृत पठनपाठन गत वैशाख १० गते देखि सुरु भएको थियो ।

नीलकण्ठ नगरपालिकाको कक्षा १२ सम्म निःशुल्क शिक्षाको घोषणा कार्यान्वयन गर्न जनशक्ति तथा पूर्वाधार व्यवस्थापन सहजताका लागि गरिएको ठूला विद्यालयहरुको समायोजन पछि एकिकृत पठन पाठन र ब्यवस्थापन प्रभावकारी रुपमा अघि बढिरहेका बिद्यालयले जनाएको छ ।

हाल प्रारम्भीक कक्षा देखि कक्षा १० सम्म कुल २ हजार ४७८ जना विद्यार्थीहरु ५९ वटा कक्षा कोठामा अध्ययन गरिरहेका छन् । जसमध्ये ४८ वटा कक्षाकोठा पूर्ण रुपमा अंग्रेजी माध्याममा र ११ वटा कक्षा नेपाली माध्यममा अध्यापन भैरहेका छन् ।

समायोजनपछि सरकारी श्रोतबाट तलब खाने शिक्षकहरु ६९ जना र विद्यालय श्रोतबाट तलब खाने ५ जना गरि ७४ जना शिक्षकहरु र विद्यालय श्रोतबाट तलब खाने १७ जना सहित २० जना विद्यालय कर्मचारी गरि जम्मा ९३ जना र कक्षा ११ र १२ का लागि २५ जना पूर्णकालीन शिक्षक र ५ जना थप विद्यालय कर्मचारीको आवस्यकता पूर्ति गर्दा कुल १२३ जना शिक्षक कर्मचारीबाट बृहत एकिकत विद्यालय सञ्चालन हुने गरि ब्यवस्थापन गरिएको बिद्यालयले जनाएको छ।

हेर्नुहोस् पत्रकार सम्मेलनको भिडियो….