२ सय ३० किलो गाँजासहित धादिङका दुई जना पक्राउ

चितवन । चितवनको राप्ती नगरपालिका-४ डडुवाबाट अवैध लागूऔषध गाँजासहित धादिङका दुई जना पक्राउ परेका छन् ।

पक्राउ पर्नेहरूमा धादिङको थाक्रे गाउँपालिका-१० बस्ने ३० वर्षीय दिनेश डंगोल र ३१ वर्षीय सुनिल डंगोल रहेका छन् ।

मंगलबार इलाका प्रहरी कार्यालय भण्डाराबाट खटिएको प्रहरीले धादिङबाट हेटौंडातर्फ आउँदै गरेको प्रदेश २-०३-००१ ख ४३३७ नम्बरको ट्रकलाई जाँच गर्दा ट्रकभित्र त्रिपाल मुनि २० वटा पोकामा लुकाई छिपाई राखिएको करिब २ सय ३० किलोग्राम गाँजा फेला पारी ट्रक चालक दिनेश र ट्रकमा सवार सुनिललाई पक्राउ गरेको हो।

यस सम्बन्धमा आवश्यक अनुसन्धान गरिरहेको प्रहरीले जनाएको छ।