भीरबाट खसेर दुईजनाको मृत्यु

गोरखा । भीरबाट खसेर उत्तरी गोरखाको एक दुर्गम गाउँमा दुईजनाको मृत्यु भएको छ।

चुमनुब्री गाउँपालिका–६ धुम्चेका करिब ४३ वर्षका रिञ्जिन लामा र सिप्चेतका करिब ४२ वर्षका हिसेदोर्जे लामाको भीरबाट खसेर मृत्यु भएको हो।

चुम्लिङ र सिप्चेतको बीचमा पर्ने धादाङकोक भन्ने ठाउँको भीरबाट करिब एक सय मिटर तल स्यारखोलामा खसेर उनीहरूको मृत्यु भएको जिल्ला प्रहरी कार्यालयका प्रहरी उपरीक्षक भरतबहादुर विकले जानकारी दिनुभयो ।

प्रहरीका अनुसार आइतबार चुम्लिङमा विद्युत् समितिको बैठक भएको थियो, बैठकबाट फर्कने क्रममा रिञ्जिन लामा हराउनुभएको थियो, उहाँको शव आज बिहान गाउँलेले भेटेका थिए,रिञ्जिनको शव हिसेदोर्जेले भेटाएका थिए।

उनको शव लिएर लिएर खोलातर्फ जाने क्रममा आज बिहान ९ बजेतिर सोही ठाउँबाट खरेस हिसेदोर्जेको मृत्यु भएको प्रहरीले जनाएको छ ।