शिक्षक संगठन धादिङद्वारा एसइईमा ४ जीपीए ल्याउने सामुदायिक विद्यालयका विद्यार्थीलाई सम्मान

धादिङ । नेपाल राष्ट्रिय शिक्षक संगठन धादिङले सामुदायिक विद्यालयबाट एसइई परीक्षामा उत्कृष्ट नतिजा हासिल गर्दै ४ जीपीए प्राप्त गर्ने विद्यार्थीलाई सम्मान गरेको छ।

संगठनको २४औँ जिल्ला परिषद् तथा सम्मान कार्यक्रममा सामुदायिक विद्यालयको शैक्षिक उपलब्धिलाई प्रोत्साहन गर्ने उद्देश्यले उत्कृष्ट विद्यार्थीहरुलाई सम्मान गरिएको हो।

सम्मानित हुनेमा विपिसा सुवेदी, नविना श्रेष्ठ, दिप्सन छत्कुली र प्रशंसा गुरुङ रहेका छन्।

उनीहरू सबैले नीलकण्ठ बालमन्दिर माध्यमिक विद्यालयबाट एसइईमा ४ जीपीए प्राप्त गरेका थिए।

त्यसैगरी आइन्स्टाइन पाण्डे र अनिरुद्र सिंह बस्नेतलाई पनि उत्कृष्ट शैक्षिक उपलब्धिका लागि सम्मान गरिएको आयोजकले जनाएको छ।

दुवै विद्यार्थी आदर्श माध्यमिक विद्यालयका हुन्।

कार्यक्रमका प्रमुख अतिथि नेपाल राष्ट्रिय शिक्षक संगठनका महासचिव प्रकाश खनालले सामुदायिक विद्यालयको शैक्षिक गुणस्तर सुधारमा शिक्षक, अभिभावक र समुदायको साझा भूमिका महत्वपूर्ण रहेको बताउनुभयो।

उहाँले सामुदायिक विद्यालयलाई थप प्रतिस्पर्धी र परिणाममुखी बनाउन सबै पक्षबीच सहकार्य आवश्यक रहेको उल्लेख गर्नुभयो।

नेपाल राष्ट्रिय शिक्षक संगठनका केन्द्रीय सदस्य तथा नेपाल शिक्षक महासंघ धादिङका अध्यक्ष ठानप्रसाद बसौलाले शिक्षक आन्दोलनले विगतदेखि शिक्षा र लोकतन्त्रको पक्षमा महत्वपूर्ण योगदान पुर्‍याएको बताउनुभयो।

उहाँले शिक्षकका हकहितसँगै शैक्षिक सुधारलाई समान प्राथमिकतामा राख्नुपर्ने धारणा व्यक्त गर्नुभयो।

नेपाल राष्ट्रिय शिक्षक संगठन धादिङका अध्यक्ष हरि बहादुर सिलवालले शिक्षा क्षेत्रलाई समयानुकूल, सीपमूलक तथा वैज्ञानिक ढंगले अगाडि बढाउन शिक्षक संगठनको भूमिका अझ प्रभावकारी हुनुपर्ने बताउनुभयो ।

कार्यक्रममा सहभागी वक्ताहरूले सकारात्मक राजनीतिक परिवर्तनसँगै शिक्षा क्षेत्रको गुणस्तरीय सुधार र शिक्षकका पेशागत हकहितका विषयलाई प्राथमिकतामा राख्न शिक्षक संगठनले अझ प्रगतिशील भूमिका खेल्नुपर्नेमा जोड दिएका छन्।

शिक्षक आन्दोलन, पेशागत हकहित, शिक्षा नीति, सूचना प्रवाह, मानवअधिकार तथा लोकतन्त्रका विषयमा समेत चर्चा गरिएको थियो।

वक्ताहरूले शिक्षा प्रणालीलाई वैज्ञानिक, सीपमूलक र व्यवहारिक बनाउन आवश्यक रहेको धारणा राखेका थिए।