त्रिपुरासुन्दरी-७ मा ६६ लाखको भैंसीपालन कार्यक्रम,२१ कृषक परिवार लाभान्वित

धादिङ । धादिङको त्रिपुरासुन्दरी गाउँपालिका-७ मा समुदायमा आधारित ‘एक वडा–एक कृषि उत्पादन’ कार्यक्रम अन्तर्गत सञ्चालन भइरहेको भैंसीपालन प्रवर्द्धन कार्यक्रम प्रभावकारी रूपमा अघि बढाइएको छ।

पशु सेवा कार्यालय धादिङले त्रिपुरेश्वर भैंसी प्रवर्द्धन कृषक समूहको साझेदारीमा सञ्चालन गरेको कार्यक्रममार्फत स्थानीय कृषकलाई व्यवसायिक भैंसीपालनतर्फ आकर्षित गर्ने प्रयास गरेको छ।

त्रिपुरासुन्दरी-७ का खहरे, लपाङ, अचनेटार र सिउरेनी क्षेत्रका २२ घरधुरीलाई लक्षित गरी सञ्चालन गरिएको कार्यक्रममा हालसम्म २१ घरधुरीलाई भैंसी वितरण गरिएको छ।

तीमध्ये ४ घरधुरीलाई दुई-दुई वटा र १७ घरधुरीलाई एक-एक वटा भैंसी प्रदान गरिएको पशु सेवा कार्यालयले जनाएको छ।

कार्यक्रमअन्तर्गत भैंसी वितरणसँगै पशुपालनलाई थप व्यवस्थित र उत्पादनमुखी बनाउन विभिन्न कृषि तथा पशुपालन सामग्री पनि वितरण गरिएको छ।

कृषकलाई एक थान मिल, ११ वटा च्याप कटरलगायत आवश्यक सामग्री उपलब्ध गराइएको छ।

आर्थिक वर्ष २०८१/०८२ देखि सुरु भएको उक्त कार्यक्रम पाँच वर्षसम्म सञ्चालन हुने योजना अनुसार कार्यान्वयन भइरहेको छ।

कार्यक्रमको कुल लागत ६६ लाख ६६ हजार ६६६ रुपैयाँ रहेको छ।

जसमध्ये पशु सेवा कार्यालय धादिङको ४० लाख रुपैयाँ, त्रिपुरासुन्दरी गाउँपालिकाको १३ लाख ३३ हजार ३३३ रुपैयाँ तथा कृषकहरूको १३ लाख ३३ हजार ३३३ रुपैयाँ बराबरको साझेदारी लगानी रहेको छ।

कार्यक्रम अन्तर्गत भैंसी वितरण मात्र नभई आधुनिक गोठ निर्माण, उन्नत घाँसको बीउ तथा बिरुवा वितरण, पशु स्वास्थ्य सम्बन्धी औषधि उपलब्ध गराउने, कृषकलाई तालिम प्रदान गर्ने तथा भैंसीको बीमा गर्ने लगायतका क्रियाकलाप सञ्चालन भइरहेको छ।

यसले पशुपालन व्यवसायलाई सुरक्षित, व्यवस्थित र उत्पादनमुखी बनाउन महत्वपूर्ण सहयोग पुग्ने अपेक्षा गरिएको छ।

पशु सेवा कार्यालय धादिङका प्रमुख डा. बबलु ठाकुरले स्थानीय स्तरमा दूध उत्पादन वृद्धि, कृषकको आम्दानी अभिवृद्धि तथा व्यवसायिक पशुपालनको विकासका लागि कार्यक्रम सञ्चालन गरिएको जानकारी दिनुभयो।

उहाँले समुदायमा आधारित उत्पादन कार्यक्रमले कृषकलाई आत्मनिर्भर बनाउनुका साथै ग्रामीण अर्थतन्त्र सुदृढ बनाउन महत्वपूर्ण भूमिका खेल्ने विश्वास व्यक्त गर्नुभयो।

यस कार्यक्रमले वडाका कृषकहरूलाई व्यवसायिक पशुपालनतर्फ आकर्षित गर्न महत्वपूर्ण भूमिका खेलेको वडा नम्बर ७ का वडा अध्यक्ष सुबास अधिकारीले बताउनुभयो।

आगामी दिनमा पनि कृषकको आवश्यकता अनुसार सहयोग र समन्वयलाई निरन्तरता दिनेछौं,” अध्यक्ष अधिकारीले भन्नुभयो।

त्यसैगरी, त्रिपुरासुन्दरी गाउँपालिकाका उपाध्यक्ष देबराज धरेलले कृषि र पशुपालनलाई गाउँपालिकाको प्राथमिकतामा राखेर कार्यक्रम सञ्चालन गरिएको बताउनुभयो।

उहाँले समुदायमा आधारित ‘एक वडा–एक कृषि उत्पादन’ कार्यक्रमले स्थानीय उत्पादन वृद्धि, आयआर्जन र ग्रामीण अर्थतन्त्र सुदृढीकरणमा टेवा पुग्ने उल्लेख गर्नुभयो।

कृषकहरूले कार्यक्रमबाट भैंसीपालन व्यवसाय विस्तार गर्न सहज भएको बताएका छन्।

भैंसी, उपकरण, तालिम तथा बीमाजस्ता सुविधाले पशुपालनलाई व्यावसायिक बनाउन थप हौसला मिलेको कृषकहरूको भनाई छ।

ग्रामीण क्षेत्रमा आयआर्जन वृद्धि, रोजगारी सिर्जना तथा दुग्ध उत्पादन बढाउने उद्देश्यसहित सञ्चालन भइरहेको उक्त कार्यक्रमले आगामी वर्षहरूमा समेत सकारात्मक परिणाम दिने अपेक्षा गरिएको छ।

सञ्चालित कार्यक्रमको केही झलकहरु (तस्विरमा)

https://www.facebook.com/share/p/1CTjhnFfkj/

भिडियोको लागि तलको लिंक क्लिक गर्नुहोस्