धादिङमा साइबर अपराध बढ्दो: तीन वर्षमा अनलाइन ठगीका पीडित पाँच गुणाले बढे

धादिङ । धादिङमा साइबर अपराध तथा अनलाइन ठगीका घटना वर्षेनी बढ्दै गएको तथ्याङ्कले देखाएको छ।

जिल्ला प्रहरी कार्यालय धादिङका अनुसार पछिल्ला तीन आर्थिक वर्षमा अनलाइन ठगीका पीडितको संख्या उल्लेख्य रूपमा वृद्धि भएको छ।

आर्थिक वर्ष २०८०/८१ मा १० महिला र १० पुरुष गरी २० जनाले अनलाइन ठगीको उजुरी दिएका थिए।

आर्थिक वर्ष २०८१/८२ मा यो संख्या बढेर १८ महिला र १९ पुरुष गरी ३७ जना पुगेको जिल्ला प्रहरी कार्यालय धादिङका प्रहरी नायव उपरीक्षक तथा सूचना अधिकारी प्रकाश दाहालले जानकारी दिनुभयो।

चालु आर्थिक वर्ष २०८२/८३ मा भने अनलाइन ठगीका घटनामा उल्लेख्य वृद्धि देखिएको छ।

यस अवधिमा २७ महिला, ८६ पुरुष र २ बालक गरी कुल ११४ जना पीडित बनेको प्रहरीको तथ्याङ्कमा उल्लेख छ।

तीन वर्षअघिको तुलनामा पीडितको संख्या पाँच गुणाभन्दा बढीले बढेको देखिन्छ।

‘साइबर अपराध र साइबर सुरक्षा’ विषयमा बोल्दै प्रहरी निरीक्षक श्यामकुमार बस्नेतले प्रविधिको बढ्दो प्रयोगसँगै साइबर अपराधका घटनासमेत क्रमशः बढ्दै गएको बताउनुभयो।

उहाँले सामाजिक सञ्जाल र डिजिटल भुक्तानी प्रणाली प्रयोग गर्दा विशेष सावधानी अपनाउन नागरिकलाई आग्रह गर्नुभयो।

प्रहरीका अनुसार आर्थिक वर्ष २०८२/८३ मा ह्वाट्सएपमार्फत ठगीका सबैभन्दा धेरै ४५ वटा उजुरी दर्ता भएका छन्।

त्यसपछि इसेवा तथा खल्तीमार्फत ४४ जना, टिकटकमार्फत १५ जना र फेसबुकमार्फत १० जना ठगिएको उजुरी परेको छ।

तथ्याङ्कले ह्वाट्सएप र डिजिटल वालेट सेवा इसेवा/खल्ती साइबर अपराधका प्रमुख माध्यमका रूपमा देखिएको जनाएको छ।

प्रहरीले अनलाइनमार्फत अपरिचित व्यक्तिसँग आर्थिक कारोबार नगर्न, सामाजिक सञ्जालमा व्यक्तिगत विवरण तथा बैंकिङ सूचना साझा नगर्न र शंकास्पद लिंक तथा सन्देशबाट सावधान रहन आग्रह गरेको छ।

साइबर अपराध प्रमाणित भएमा विद्युतीय कारोबार ऐन, २०६३ अनुसार मुद्दा दर्ता गरी कानुनी कारबाही अघि बढाइने प्रहरीले जनाएको छ।

उक्त ऐनअनुसार कसूरदारलाई पाँच वर्षसम्म कैद, एक लाख रुपैयाँसम्म जरिवाना वा दुवै सजाय हुन सक्ने व्यवस्था छ।

सजायको मात्रा भने अपराधको प्रकृति, गम्भीरता, उपलब्ध प्रमाण तथा अदालतको फैसलाका आधारमा निर्धारण हुने कानुनी व्यवस्था रहेको छ।