फेरि पहिलो स्थानमा जिल्ला प्रहरी कार्यालय धादिङ

धादिङ । जिल्ला प्रहरी कार्यालय धादिङले कार्यसम्पादन मूल्याङ्कनमा फेरि उत्कृष्ट नतिजा हासिल गरेको छ। नेपाल प्रहरी प्रधान कार्यालयले गरेको पछिल्लो मूल्याङ्कनमा धादिङ प्रहरी लगातार तेस्रो पटक पहिलो स्थानमा पर्न सफल भएको हो।

प्रहरी उपरीक्षक (एसपी) को नेतृत्वमा सञ्चालन भएका देशभरका १५ पहाडी जिल्ला प्रहरी कार्यालयको असार महिनाको कार्यसम्पादन मूल्याङ्कनमा धादिङ उत्कृष्ट ठहरिएको नेपाल प्रहरीले जनाएको छ।

मूल्याङ्कनका क्रममा अपराध नियन्त्रण तथा अनुसन्धान, फरार प्रतिवादी पक्राउ, लागूऔषध नियन्त्रण, अवैध हातहतियार बरामद, राजस्व छली तथा भन्सार चोरीका सामान नियन्त्रण, पुराना मुद्दाको अनुसन्धान र फैसला कार्यान्वयनलगायतका सूचकमा धादिङ प्रहरीले उल्लेखनीय नतिजा हासिल गरेको थियो।

त्यसैगरी कार्यालय व्यवस्थापन, अभिलेख संरक्षण, राजमार्ग सुरक्षा, सवारी दुर्घटना न्यूनीकरण, उजुरी तथा गुनासो व्यवस्थापन, प्रहरी परिचालन, अनुशासन कायम र विपद् व्यवस्थापनका क्षेत्रमा समेत धादिङ प्रहरीको कार्यसम्पादन प्रभावकारी देखिएको मूल्याङ्कनमा उल्लेख छ।

समुदाय–प्रहरी साझेदारी कार्यक्रममार्फत विद्यालयस्तरमा सचेतनामूलक गतिविधि सञ्चालन गरिँदै आएको जिल्ला प्रहरी कार्यालय धादिङका प्रहरी नायब उपरीक्षक प्रकाश दाहालले बताउनुभयो ।

स्थानीय तहसँगको सहकार्यमा सामाजिक विकृति तथा विसङ्गतिविरुद्ध अभियान सञ्चालन गर्दै अपराध न्यूनीकरणका प्रयासलाई पनि निरन्तरता दिइएको उहाँको भनाई छ ।

दाहालले कार्यसम्पादन मूल्याङ्कन प्रणालीले प्रहरी संगठनभित्र सकारात्मक प्रतिस्पर्धाको वातावरण सिर्जना गर्नुका साथै सेवा प्रवाहलाई थप प्रभावकारी, पारदर्शी र नागरिकमैत्री बनाउन सहयोग पुगेको बताउनुभयो ।