मृगौला पीडित धन बहादुरलाई साढे ७ लाख सहयोग

धादिङ। धादिङको नेत्रावती डबजोङ गाउँपालिका-१ थला गाउँका मिर्गौला रोगी धनबहादुर तामाङ (धनलुङ) को उपचारका लागि संकलन गरिएको ७ लाख ४६ हजार ८ सय १५ रुपैयाँ परिवारलाई हस्तान्तरण गरिएको छ।

दुवै मिर्गौला फेल भएपछि हाल घाँटीमा क्यानुला (लाइन) राखेर नियमित डायलाइसिस गराइरहेका तामाङको स्वास्थ्य अवस्था जटिल रहेकाले चिकित्सकको सल्लाहअनुसार तत्काल मिर्गौला प्रत्यारोपण (किड्नी ट्रान्सप्लान्ट) गर्ने तयारी भइरहेको छ।

परिवारको आर्थिक अवस्था कमजोर भएकाले उपचार खर्च जुटाउन नेत्रावती डबजोङ गाउँपालिका-१ वडा कार्यालयको नेतृत्व तथा थला गाउँ सेवा समाजको सहकार्यमा सामाजिक सञ्जालमार्फत सहयोग अभियान सञ्चालन गरिएको थियो।

थला गाउँ सेवा समाजका अध्यक्ष पूर्णबहादुर घलेको एनआईएमबी बैंकको क्यूआर कोडमार्फत देश तथा विदेशमा रहेका नेपालीहरूबाट ७ लाख ४६ हजार ८ सय १५ रुपैयाँ संकलन भएको वडाध्यक्ष ठाकुर गुरुङले जानकारी दिनुभयो ।

उहाँका अनुसार, “देश तथा विदेशमा रहेका नेपाली दाजुभाइ तथा दिदीबहिनीहरूको साथ र सहयोगबाट करिब साढे सात लाख रुपैयाँ संकलन भएको हो। सहयोग गर्नुहुने सम्पूर्ण सहयोगी मनहरूप्रति हार्दिक आभार व्यक्त गर्दछौँ। यो सहयोगले धनबहादुरको उपचारमा ठूलो टेवा पुग्ने र उहाँले नयाँ जीवन पाउने विश्वास लिएका छौँ। आवश्यक थप रकम जुटाउन पनि प्रयास जारी रहनेछ।”

वडाध्यक्ष गुरुङका अनुसार धनबहादुरका लागि आफन्तबाट मिर्गौला दान गर्ने प्रक्रिया पूरा भइसकेको छ भने छिट्टै प्रत्यारोपण गर्ने तयारी भइरहेको छ। नेत्रावती डबजोङ गाउँपालिकाले पनि स्थानीय सरकारका तर्फबाट आर्थिक सहयोग गर्दै आएको जनाएको छ।

उपचारका लागि अझै ठूलो रकम आवश्यक पर्ने भएकाले सहयोग गर्न इच्छुक सबैलाई मानवीय सहयोगमा हातेमालो गर्न वडाध्यक्ष गुरुङले आग्रह गर्नुभएको छ ।