धादिङसहित तीन जिल्लामा आज सार्वजनिक बिदा,अन्य जिल्लामा राष्ट्रिय शोक मात्र

धादिङ । बागमती प्रदेश सरकारले धादिङसहित तीन जिल्लामा आज सार्वजनिक बिदा दिएको छ।

प्रदेश सरकारले चेपाङ जातिको न्वागी (छोनाम) पर्वको अवसरमा आज सोमबार तीन जिल्ला धादिङ, चितवन र मकवानपुरमा आज सार्वजनिक बिदा दिएको हो।

प्रदेशको आन्तरिक मामिला तथा कानुन मन्त्रालयले भदौ १८ राजपत्रमा प्रकाशित गरेको सूचनामा तीन जिल्लामा सोमबार सार्वजनिक बिदा दिएको उल्लेख छ।

यस्तै संघ सरकारले भोटेकोसी बाढीमा परी ज्यान गुमाएकाहरूको सम्मानमा आज राष्ट्रिय शोक घोषणा गरेको छ।

भदौ १० गते नेपाल-चीन सीमा रसुवाको भोटेकोसी नदीमा आएको अकल्पनीय भीषण बाढीका कारण मृत्यु भएकाहरूको सम्मानमा आज भदौ २२ गते १३औँ दिन पुण्यतिथि पारेर राष्ट्रिय शोक घोषणा गरेको हो।

यस क्रममा देशभरका सरकारी कार्यालय तथा विदेशस्थित नेपाली दूतावास र नियोगमा राष्ट्रिय झन्डा आधा झुकाइने गृह मन्त्रालयले जनाएको छ।

यद्यपि आज धादिङ, चितवन र मकवानपुर जिल्लामा बाहेक अन्य जिल्लामा सार्वजनिक बिदा नभएको जनाएको छ ।