धादिङबासीले वेलिबृज माग्दै तीव्र बनाए सामाजिक सञ्जालमा ‘#ConnectDhading’ अभियान

धादिङ । धादिङका नागरिकहरुले त्रिशूली नदी वारपार गर्न तत्काल वेलिबृजको माग गर्दै सरकारलाई दवाद दिन थालेका छन्।

बाढीले निम्त्याएको संकट समाधानका लागि धादिङबासीहरूले सामाजिक सञ्जालबाटै सरकारलाई दबाब दिन थालेका हुन् ।

छिटो भन्दा छिटो स्थायी पुल निर्माण र तत्कालका लागि वैकल्पिक पुलको व्यवस्था गर्न माग गर्दै फेसबुकमा ‘#ConnectDhading’ अभियान तीव्र पारिएको छ ।

आइतबारदेखि सुरु भएको यो अभियान छोटो समयमै व्यापक बनेको छ ।फेसबुकले यो ह्यासट्यागलाई ट्रेन्डिङमा देखाउन थालेको छ ।

नागरिकस्तरबाट उठेको यो दबाबले सम्बद्ध निकायको ध्यान खिचेको छ । स्थानीयहरूले तत्काल बेलिब्रिज जडान गरी यातायात सहज बनाउन र पक्की पुलको काम अघि बढाउन माग गरिरहेका छन् ।

भोटेकोसीको बाढीले राष्ट्रिय राजमार्गसँग धादिङबेसी जोड्ने त्रिशूली नदीमाथिको मुख्य पुल बगाएपछि यातायात ठप्प छ ।

वैकल्पिक मार्ग सञ्चालनमा आए पनि हिलाम्मे सडकका कारण यातायात आवतजावतमा कठिनाइ भएको छ। राजमार्ग जोड्ने पुल नहुदा धादिङको ८ वटा स्थानीय तह प्रत्यक्ष रूपमा प्रभावित भएका छन् भने नागरिकको दैनिक जीवनयापन तथा आपत्कालीन सेवामा ठूलो सास्ती थपिएको छ।