परेवाटार-मासटार वैकल्पिक सडकमा एकतर्फी सवारी, कुन समयमा कता जान पाइन्छ?

धादिङ । बाढीका कारण फुर्केखोलाको पक्की पुल बगेपछि प्रयोगमा ल्याइएको परेवाटार-मासटार वैकल्पिक सडकमा सवारी आवागमन एकतर्फी गरिएको छ।

सडक साँघुरो रहेकाले सवारी आवागमनलाई थप व्यवस्थित बनाउन भदौ २७ गतेदेखि लागू हुने गरी समय निर्धारण गरेर एकतर्फी सवारी सञ्चालनको व्यवस्था गरिएको जिल्ला प्रशासन कार्यालय धादिङले जनाएको छ।

बिहान ६ बजेदेखि दिउँसो १२ बजेसम्म गल्छी–मासटारबाट परेवाटार हुँदै धादिङबेंसीतर्फ आउने सवारी साधन सञ्चालन हुनेछन्। उक्त समयमा धादिङबेंसीतर्फ आउने सवारीले मासटारको पुल कटिसक्नुपर्नेछ।

त्यस्तै, दिउँसो १ बजेदेखि साँझ ७ बजेसम्म धादिङबेंसीबाट परेवाटार हुँदै मासटार–गल्छीतर्फ जाने सवारी साधन सञ्चालन हुनेछन्।

यस समयमा जाने सवारीले परेवाटार कटिसक्नुपर्ने प्रशासनले जनाएको छ।

यसअनुसार बिहानको समयमा मासटारबाट धादिङबेंसीतर्फ र दिउँसोको समयमा धादिङबेंसीबाट मासटार–गल्छीतर्फ सवारी सञ्चालन हुने भएको छ।

तोकिएको समयबाहेकको अवधिमा भने सुरक्षा अवस्था तथा आवश्यकताअनुसार सम्बन्धित सुरक्षा निकाय र ट्राफिक प्रहरीले सवारी आवागमनको आवश्यक व्यवस्थापन गर्ने प्रशासनले जनाएको छ।

भदौ १० गतेको बाढीका कारण गजुरी गाउँपालिका-२ र सिद्धलेक गाउँपालिका-६ जोड्ने फुर्केखोलामा रहेको पक्की पुल बगेपछि धादिङबेंसी जोड्ने मुख्य सडकमार्ग प्रभावित बनेको थियो।

त्यसपछि परेवाटार-मासटार सडकलाई वैकल्पिक मार्गका रूपमा प्रयोगमा ल्याइएको हो।