गजुरीको जहरेखेतमा बस र ट्रक ठोक्किँदा चार जना घाइते

धादिङ । पृथ्वी राजमार्गअन्तर्गत धादिङको गजुरी गाउँपालिका-६ जहरेखेतमा बस र ट्रक एकापसमा ठोक्किँदा चार जना घाइते भएका छन्।

शुक्रबार बिहान काठमाडौँबाट धादिङबेँसीतर्फ आउँदै गरेको बा ४ ख ८६६७ नम्बरको यात्रुवाहक बस र विपरीत दिशाबाट जाँदै गरेको ना ५ ख ७४१४ नम्बरको ट्रक एकआपसमा ठोक्किएका हुन्।

दुर्घटनामा ज्वालामुखी गाउँपालिका–२, धादिङकी ८० वर्षीया दिवाकुमारी दानी र सोही ठाउँकी ५० वर्षीया धनकुमारी केसी घाइते भएका छन्।

यसैगरी बसका सहचालक गल्छी गाउँपालिका–१ का १७ वर्षीय रामचन्द्र परियार र बस चालक नुवाकोटको विदुर नगरपालिका–७ का ३३ वर्षीय समियाल तामाङ घाइते भएका छन्।

घाइतेहरूको स्थानीय स्वास्थ्य संस्थामा उपचार भइरहेको छ।

दुर्घटनाका कारण बस र ट्रकको अघिल्लो भागमा पूर्ण रूपमा क्षति पुगेको प्रहरीले जनाएको छ।

ट्रक चालक चितवनको भरतपुर महानगरपालिका–२९ का करिब ३५ वर्षीय कमल देवकोटालाई प्रहरीले नियन्त्रणमा लिएको छ।