धादिङमा बाढीको विनाश : घरदेखि पुलसम्म क्षति, ५१७ परिवार विस्थापित

धादिङ। धादिङमा विनाशकारी बाढीका कारण ५ सय १७ परिवार विस्थापित भएका छन् ।

बाढीले जिल्लाका विभिन्न स्थानमा घर, पुल तथा सडकमा ठूलो क्षति पुर्‍याएपछि सयौँ परिवार सुरक्षित स्थानमा सर्न बाध्य भएका हुन् ।

विस्थापितमध्ये गल्छी गाउँपालिकामा २ सय ७९, गजुरी गाउँपालिकामा २ सय १६, बेनिघाट रोराङ गाउँपालिकामा २० र सिद्धलेक गाउँपालिका–७ मा २ परिवार रहेका छन् ।

बाढीका कारण धादिङमा १ सय १४ घर पूर्ण रूपमा क्षतिग्रस्त भएका छन् भने ३ वटा पक्की पुल र ६ वटा झोलुङ्गे पुल बगेका छन् ।

त्रिशूली नदी आसपासका महेशदोभान, बैरेनी, घाटबेँसी,गलौदी लगायतका क्षेत्रमा घर तथा बस्ती डुबान र कटानमा परेका छन् ।

बाढीपछि सडकका विभिन्न खण्डमा पहिरो र कटान हुँदा जिल्लाभित्रको यातायातसँगै काठमाडौं आवतजावतसमेत प्रभावित भएको छ ।

यसैबीच, घरबार गुमाएर विस्थापित भएका परिवारको व्यवस्थापनका लागि धादिङमा दुई वटा होल्डिङ सेन्टर सञ्चालनमा छन् ।

गजुरी गाउँपालिका–५, गलौदीस्थित होल्डिङ सेन्टरमा ४६ परिवारका १ सय ४४ जना र गजुरी गाउँपालिका–६, रातमाटेस्थित होल्डिङ सेन्टरमा ३८ परिवारका ९८ जना अस्थायी आश्रय लिएर बसिरहेका छन् ।