कृष्णभीरमा नाली निर्माण र ग्राभेलिङ सुरु, असोज १ देखि यातायात सञ्चालनको तयारी

धादिङ । पृथ्वी राजमार्गअन्तर्गत धादिङको बेनीघाट रोराङ गाउँपालिका-७ स्थित कृष्णभीरमा सडक सञ्चालनका लागि नयाँ ट्रयाक निर्माणसँगै नाली निर्माण र ग्राभेलिङको काम सुरु गरिएको छ।

भदौ १४ गते त्रिशूली नदीमा आएको बाढीले तटीय क्षेत्रमा कटान गर्दा सडक भासिएपछि कृष्णभीरमा यातायात आवागमन ठप्प भएको थियो ।

सडक अवरुद्ध भएको १५ दिनमा नयाँ ट्रयाक तयार पारिएपछि अहिले सवारी सञ्चालनलाई सहज बनाउने गरी थप पूर्वाधार निर्माणको काम अघि बढाइएको हो ।

सडकलाई असोज १ गतेदेखि सञ्चालनमा ल्याउने तयारीसहित काम तीव्र पारिएको नागढुंगा-मुग्लिन सडक आयोजना पश्चिम खण्डका सूचना अधिकारी सचिन्द्र मिश्रले जानकारी दिनुभयो।

सडकको दिगोपन र सुरक्षित आवागमनका लागि पानीको निकास व्यवस्थित गर्न नाली निर्माण तथा सडकमा सवारीसाधन सहज रूपमा गुडाउन ग्राभेलिङको काम भइरहेको उहाँले बताउनुभयो ।

बाढीका कारण करिब एक सय मिटर सडक भासिएपछि अवरुद्ध खण्डलाई जोड्न करिब तीन सय मिटर लामो नयाँ ट्रयाक निर्माण गरिएको छ ।

सडक विभाग तथा प्राविधिक टोलीको अध्ययनअनुसार भासिएको सडकलाई बाइपास गर्ने गरी भिरतर्फको करिब ३० मिटर उचाइबाट चट्टान काटेर नयाँ मार्ग निर्माण गरिएको हो ।