कृष्णभीरको सडकमा भोलीदेखि यातायात संचालन हुने

धादिङ । अवरुद्ध कृष्णभीर सडक १८ दिनपछि संचालनमा आएको छ।

भदौ १४ गते त्रिशूली नदीको कटानले सडक भासिएकै कुनापट्टीबाट लगातार १३ दिन काम गरेर करिब २५२ मिटर लामो नयाँ ट्रयाक निर्माण गरी सडक संचालनमा ल्याइएको हो ।

नयाँ ट्रयाकमा ग्राबेलिङ र नाला निर्माण गरिएको छ ।

भदौ १८ गतेबाट ३१ गतेसाँझसम्म दैनिक १८ घण्टासम्म विभिन्न उपकरण र प्राविधिक प्रयोग गरी देशको लाइफलाइन खुलाएको नागढुंगा मुग्लिन सडक आयोजनाले जनाएको छ।

पहिरो क्षेत्रमा निरन्तर डोजर र प्राविधिक राखेर भोलि असोज १ गते बिहान देखि नियमित सवारी संचालन गरिने धादिङका प्रमुख जिल्ला अधिकारी लक्ष्मी पाण्डेय गौतमले बताउनुभयो ।

सडकको पुरै भाग पहिरिएपछि पुरानो संरचनाको विकल्पमा माथिल्लो भाग काटेर सडक चौडा गरी नयाँ ट्रयाक बनाइएको नागढुंगा मुग्लिन सडक आयोजनाका प्रभुराज पाण्डेले जानकारी दिनुभयो ।

भित्ता काटेर बाटो बनाउने क्रममा पहराका ठाउँठाउँबाट पानी रसाइरहेको छ ।

कृष्णभीरको भित्तामा जता छोयो उतैबाट पानी निस्कने अनौठो समस्या छ ।

भित्ताबाट रसाएको पानी निर्माण व्यवसायी र इन्जिनियरहरूका लागि टाउको दुखाइको विषय बनेको छ।

कृष्णभीर देशको चर्चित पहिरो हो ।

यो पहिरो २६ वर्षअघि निकै ठूलो मेहनत, उच्च प्राविधिक सीप, लामो अनुभवको प्रयोग र प्रयासपछि रोकिएको थियो ।

यसअघि वि.सं. २०५७ साल साउन २७ गते पहिरो खस्दा कृष्णभीर ११ दिनसम्म अबरुद्ध हुन पुगेको थियो।