विदुर-बेत्रावती सडक खुल्न अझै केही दिन,दशैँअघि स्याफ्रुबेँसी जोड्ने लक्ष्य

धादिङ । भदौ १० गतेको बाढीबाट क्षतिग्रस्त विदुर–बेत्रावती सडकखण्ड सञ्चालनमा आउन अझै केही दिन लाग्ने भएको छ।

विदुरदेखि बेत्रावतीसम्मको करिब १० किलोमिटर सडकखण्डमध्ये ९ किलोमिटर सडक सञ्चालनमा आइसकेको छ। तर करिब ३०० मिटर क्षेत्रमा पहिरो र चट्टानका कारण सडक खुलाउन ढिलाइ भएको हो।

उक्त क्षेत्रमा नेपाली सेना र व्यवसायीहरूले दुवैतर्फबाट ट्रयाक खोल्ने काम गरिरहेका छन्।

केही दिनभित्रै यातायात सञ्चालन गर्ने लक्ष्य रहेको नुवाकोटका प्रमुख जिल्ला अधिकारी शम्भु प्रसाद रेग्मीले बताउनुभयो।

बाढीका कारण सडकको पुरानै संरचना र नक्सासमेत नरहने गरी क्षति भएका स्थानमा नयाँ ट्रयाक निर्माण गरेर सडक सञ्जाल जोड्नुपर्ने अवस्था छ।

अबको करिब तीन साताभित्र स्याफ्रुबेँसीसम्म सडक सञ्जाल जोड्ने लक्ष्यसहित काम भइरहेको प्रमुख जिल्ला अधिकारी रेग्मीले बताउनुभयो।

धादिङको गल्छीदेखि देविघाट हुँदै विदुरको ढुंगेसम्म अधिकांश स्थानमा सडक मर्मतपछि यातायात सञ्चालनमा आइसकेको छ।

बेत्रावतीसम्म सडक सञ्चालनमा आएपछि बेत्रावती र स्याफ्रुबेँसीमा बेलीब्रिज जडान गरेर गल्छीदेखि स्याफ्रुबेँसीसम्म यातायात सञ्चालन गर्ने तयारी भइरहेको छ।

बेत्रावतीपछि धुन्चे हुँदै स्याफ्रुबेँसीसम्मको सडकमा एउटा बेलीब्रिज जडान गर्नुपर्ने सडक विभागले जनाएको छ।

स्याफ्रुबेँसीमा करिब ९० मिटर लामो पुल आवश्यक पर्ने भए पनि उपलब्ध संरचनाअनुसार ७६ मिटरको बेलीब्रिज जडान गर्ने तयारी गरिएको विभागले जनाएको छ।