पृथ्वी राजमार्गमा सवारी आवागमन पूर्ण रूपमा बन्द

धादिङ । धादिङमा निरन्तर वर्षासँगै पृथ्वी राजमार्गका विभिन्न स्थानमा पहिरो गएर सडक अवरुद्ध भएपछि राजमार्गमा सवारी आवागमन पूर्ण रूपमा रोक लगाइएको छ।

जिल्ला प्रशासन कार्यालय धादिङले शुक्रबार बिहान एक सूचना जारी गर्दै अर्को सूचना जारी नभएसम्म पृथ्वी राजमार्ग भएर चल्ने सम्पूर्ण सवारीसाधनको आवागमनमा पूर्ण रूपमा रोक लगाइएको जनाएको हो।

मौसममा आएको परिवर्तनका कारण धादिङ जिल्ला तथा आसपासका क्षेत्रमा विगत दुई दिनदेखि निरन्तर वर्षा भइरहेको छ।

वर्षाका कारण पृथ्वी राजमार्गका विभिन्न स्थानमा पहिरो गई राजमार्ग अवरुद्ध भएको प्रशासनले जनाएको छ।

मौसम विज्ञान विभागले आगामी केही दिनसम्म भारीदेखि अति भारी वर्षा हुनसक्ने सम्भावना रहेको सूचना जारी गरेकाले थप विपद्जन्य जोखिम उत्पन्न हुन सक्ने अवस्थालाई मध्यनजर गर्दै यात्रु तथा सवारीसाधनको सुरक्षाका लागि आवागमन रोकिएको प्रमुख जिल्ला अधिकारी लक्ष्मी पाण्डेय (गौतम)द्वारा जारी सूचनामा उल्लेख छ।

प्रशासनले यात्रु तथा सवारी चालकलाई राजमार्गमा आवागमन नगर्न आग्रह गरेको छ।

साथै आवश्यक सहयोग, समन्वय तथा सहजीकरणका लागि सम्बन्धित निकायका सम्पर्क नम्बरमा सम्पर्क गर्न अनुरोध गरिएको छ।

सम्पर्क नम्बरहरू :
-नेपाल प्रहरी हटलाइन : १००
-सशस्त्र प्रहरी बल नेपाल : १११४
-जिल्ला आपतकालीन सञ्चालन केन्द्र (DEOC) : १२३४ / ०१०–५२१४६४
-जिल्ला प्रहरी कार्यालय, धादिङ (सूचना अधिकारी) : ९८५१२२९८६०
-जिल्ला ट्राफिक प्रहरी कार्यालय, धादिङ : ९८५१३२२५६४
-सशस्त्र प्रहरी बल विपद् व्यवस्थापन बेस, आदमघाट : ९८५१२७२७८३