थप पहिरो नआए बुधबार दिउँसोदेखि पृथ्वीराजमार्ग पूर्णरुपमा सञ्चालनमा आउने

धादिङ । अविरल वर्षाका कारण पहिरो तथा सडक भासिएर अवरुद्ध बनेको पृथ्वीराजमार्ग बुधबार दिउँसोदेखि पूर्णरुपमा सञ्चालनमा आउने भएको छ।

जिल्ला प्रशासन कार्यालय धादिङले एक सूचना जारी गर्दै थप पहिरो तथा अन्य अवरोध नआएमा १४ गते बुधबार अपराह्न १ बजेदेखि पृथ्वीराजमार्ग भएर चल्ने सबै सवारी साधन पूर्णरुपमा सञ्चालनमा आउने जनाएको हो।

असोज ७ गते रातिदेखि परेको अविरल वर्षाका कारण पृथ्वीराजमार्गका विभिन्न स्थानमा पहिरो खस्नुका साथै सडक भासिएपछि राजमार्ग अवरुद्ध भएको थियो।

अहिले पहिरो तथा अन्य अवरोध हटाउने काम भइरहेको र हाल एकतर्फी रुपमा सवारी आवागमन सञ्चालनमा रहेको प्रशासनले जनाएको छ।

वर्षा रोकिए पनि राजमार्गका विभिन्न स्थानमा पहिरोको जोखिम कायमै रहेको जनाएको छ।

जुनसुकै समयमा पहिरो खस्न सक्ने सम्भावना रहेकाले सवारी चालक, यात्रु तथा सर्वसाधारणलाई सावधानीपूर्वक यात्रा गर्न आग्रह गरिएको छ।

साथै सवारी चालक तथा सडक प्रयोगकर्तालाई प्रचलित ट्राफिक नियम र सडक अनुशासन पूर्णरुपमा पालना गर्न जिल्ला प्रशासन कार्यालयले अनुरोध गरेको छ।