धादिङ-गोरखा सडक सम्पर्क विच्छेद,खाद्यान्न र इन्धन अभाव हुन नदिने प्रशासनको भनाइ

धादिङ । बाढीले धादिङको त्रिपुरासुन्दरी गाउँपालिका-२ र गोरखाको आरुघाट गाउँपालिका-९ जोड्ने पक्की पुल बगाएपछि धादिङ र गोरखाबीचको सडक सम्पर्क विच्छेद भएको छ ।

पुल बगाएसँगै धादिङमा खाद्यान्न, ग्यास तथा पेट्रोलियम पदार्थको आपूर्ति प्रभावित हुन सक्ने चिन्ता बढेको छ ।

यसअघि भदौ १० गते आएको बाढीले फुर्केखोलाको पुल बगाएपछि मालवाहक सवारीसाधनले आरुघाटको पुललाई वैकल्पिक मार्गका रूपमा प्रयोग गर्दै आएका थिए ।

तर, उक्त पुलसमेत बगाएपछि धादिङमा अत्यावश्यक सामग्रीको ढुवानी थप चुनौतीपूर्ण बनेको छ ।

यद्यपि, जिल्लामा तत्काल खाद्यान्न तथा इन्धनको अभाव नहुने धादिङकी प्रमुख जिल्ला अधिकारी लक्ष्मी पाण्डेय (गौतम) ले बताउनुभएको छ ।

उहाँका अनुसार जिल्लामा करिब एक महिनालाई पुग्ने खाद्यान्न र एक सातालाई पुग्ने ग्यास मौज्दात छ । पेट्रोलियम पदार्थको आपूर्ति सहज बनाउनसमेत पहल भइरहेको बताउनुभयो।

‘उहाँले भन्नुभयो, ‘जिल्लामा करिब एक महिनालाई पुग्ने खाद्यान्न र एक सातालाई पुग्ने ग्यास मौज्दात छ । पेट्रोलियम पदार्थ ल्याउने वातावरण बनाउँदै छौँ,’ उनले भनिन्, ‘खाद्यान्न, ग्यास तथा पेट्रोलियम पदार्थको अभाव हुन दिँदैनौँ।’

बाढीबाट प्रभावित परिवारको तत्कालीन व्यवस्थापन गरिएको भए पनि दीर्घकालीन पुनःस्थापना र व्यवस्थापनका लागि अध्ययन तथा छलफल गरी आवश्यक कदम चालिने प्रमुख जिल्ला अधिकारी पाण्डेयले बताउनुभयो।

धादिङलाई सडक सञ्जालसँग जोडिराख्न तथा अत्यावश्यक सामग्रीको आपूर्ति सहज बनाउन सम्बन्धित निकायसँग समन्वय र पहल भइरहेको उहाँको भनाइ छ।