४ बर्षदेखी अलपत्र आरुवासटार पुल एक बर्षभित्रमा निर्माण सम्पन्न गराउँछु : पाण्डे

अडियोमा सुन्नुहोस

धादिङ,२३ कात्तिक ।
सत्तारुढ गठबन्धनको तर्फबाट धादिङ क्षेत्र नं. १ प्रतिनिधि सभा सदस्यका उम्मेदवार राजेन्द्रप्रसाद पाण्डेले आफू निर्वाचित भएमा एक वर्षभित्रमा आरुवासटारको पक्की पुल निर्माण सम्पन्न गराउने बताउनुभएको छ ।

बुधबार आयोजित एक चुनाबी कार्यक्रममा बोल्दै पाण्डेले सिद्धलेकको आरुवासटारमा ४ वर्षदेखी अलपत्र रहेको त्रिशुली नदीको पुल निर्वाचित भएको वर्षदिन भित्र निर्माण सम्पन्न गरेर उद्घाटन गर्ने बताउनुभएको हो ।

पृथ्वी राजमार्गस्थित मलेखुबाट आरुवासटार हुँदै बुढिगण्डकी जलविद्युत आयोजनाको निर्माणाधिन स्थलसम्म जाने त्रिशुली नदीमा पुल निर्माणको काम ४ वर्षदेखि अलपत्र अवस्थामा हुँदा समस्या झेल्नुपरेको भन्दै स्थानीयले गुनासो गर्ने गरेको भन्दै उम्मेदवार पाण्डेले आफु निर्वाचित भएलगत्तै काम अगाडि बढाउने प्रतिवद्धता जनाउनुभएको हो ।

बागमती प्रदेशका मुख्यमन्त्री समेत रहनुभएका पाण्डेले भन्नुभयो,‘त्यस पुल बन्नुअघी आरुवासटारका साथीहरुले सहकारीको कार्यक्रममा मलाई काठको पक्कि पुल बनाएर चिनो प्रदान गरी पुल निर्माण गरिदिन आग्रह गरेका थिए ।

त्यस लगत्तै मैले पुल निर्माणमा पहल गरेँ र उक्त पुल निर्माणको चरणमा गयो । अहिले उक्त पुल निर्माण कार्य रोकिएको छ । अलपत्र पुल कसरी, के कारणले रोकिएको हो, मंसिर ४ गतेपछि खोतलेर समयमै सम्पन्न गर्ने प्रतिवद्धता जनाउँछु।’

पाण्डेले आफ्नो पहिलो प्राथमिकतामा बुढिगण्डकी जलविद्युत आयोजना रहेको र उक्त आयोजनामा प्रत्यक्ष सम्बन्ध राख्ने आरुवासटारको पक्कि पुल निर्माण पनि प्रमुख भुमिकामा रहेको बताउनुभयो ।

उक्त पुलमा कस्को कमजोरीका कारण ढिलाशुस्ती भएको हो अनुसन्धान गरी ठेकेदारको कमजोरी भए कालोसुचीमा राखी कारबाही गर्ने र अर्को ठेकेदार छनोट गरी एक बर्षभित्र पुल निर्माण सम्पन्न गराएरै छाड्नेसमेत प्रतिबद्धता जनाउनुभएको छ ।