धादिङको १०४ मतदान स्थल अतिसंवेदनशील,अवान्छित गतिविधि हुन नदिन निर्देशन

अडियोमा सुन्नुहोस

धादिङ,०३ मंसिर ।
भोलि आईतबार हुने प्रतिनिधि तथा प्रदेश सभा निर्वाचनको लागि धादिङमा ११४ मतदान स्थल र ३०३ वटा मतदान केन्द्र रहेको छ । जिल्ला निर्वाचन सुरक्षा समितिले जिल्लाको कुल ११४ मतदान स्थल मध्ये १०४ वटा स्थललाई अतिसंवेदनशीलको सूचिमा राखेको छ ।

सुरक्षा संवेदनशीलताको दृष्टिकोणले मतदान स्थलको वर्गिकरण गरी १०४ स्थललाई अतिसंवेदनशीलको सूचिमा राखिएको जिल्ला निर्वाचन कार्यालय धादिङका निर्वाचन अधिकृत सन्तोष कुमार श्रेष्ठले बताउनुभयो ।

श्रेष्ठका अनुसार सात वटालाई संवेदनशील र तीन वटा मतदान स्थललाई सामान्यको सूचिमा वर्गिकरण गर्दै सुरक्षा योजना तर्जुमा गरिएको हो । भौगोलिक विकटता, मतदाता र मतदान केन्द्रको दूरी र सुरक्षा पोस्टको पहुँचसहितका विभिन्न सूचकलाई आधार मानेर मतदान केन्द्रको वर्गीकरण गरिएको हो ।

अति संवेदनशील र संवेदनशील सूचीमा परेका मतदान केन्द्रमा सोहीअनुसारको सुरक्षा प्रबन्ध मिलाइएको जिल्ला प्रहरी कार्यालय धादिङका प्रहरी नायव उपरिक्षक श्याम बहादुर खत्रीले बताउनुभयो । मतदान अधिकृत, मतदानस्थलमा खटिएका कर्मचारी र मतदानमा खटिएका सुरक्षाकर्मीलाई अवान्छित गतिविधि हुन नदिन निर्देशन दिइएको पनि बताउनुभयो ।

धादिङमा आधिकारिक दल र स्वतन्त्र गरी प्रतिनिधिसभामा २८ जना र प्रदेशसभामा ३८ जना उम्मेदवार छन् ।file photo