नगरपालिका संघको अध्यक्षमा धादिङ नीलकण्ठका प्रमुख ढुंगाना निर्वाचित

अडियोमा सुन्नुहोस

धादिङ,०६ पौष ।
नेपाल नगरपालिका सङ्घको अध्यक्षमा धादिङको नीलकण्ठ नगरपालिकाका प्रमुख भीम प्रसाद ढुंगाना चयन भएका छन् ।

बुधबार काठमाडौँमा सम्पन्न नगरपालिका सङ्घको ८ औं राष्ट्रिय सम्मेलनले नेपाली कांग्रेसबाट निर्वाचित धादिङका ढुंगानाको अध्यक्ष्यतामा ४४ सदस्यीय नयाँ कार्यसमिति चयन गरेको छ ।

जसमा यस्तै उपाध्यक्षमा सिन्धुपाल्चोकको चौतारासाँगागढी नगरपालिकाका प्रमुख नेकपा माओवादी केन्द्रबाट निर्वाचित कृष्णप्रसाद सापकोटा चयन भएका छन्।

महासचिवमा नेकपा एमालेका तर्फबाट दाङको घोराही उप महानगरपालिकाका प्रमुख नरुलाल चौधरी चयन भएका छन् ।यस्तै उपमहासचिवमा काठमाडौं महानगरपालिकाकी उपप्रमुख सुनिता डंगोल चयन भएकी छिन् ।

कोषाध्यक्षमा नेपाली कांग्रेसबाट खोटाङको हलेसी तुवाचुङ नगरपालिकाकी प्रमुख विमला राई र सहकोषाध्यक्षमा हेटौंडा उपमहानगरपालिकाकी प्रमुख एकीकृत समाजवादीकी मीना लामा चयन भएकी छन् ।

स्थानीय तहको निर्वाचन भएपछि पालिकामा जित हासिल गरेको पार्टीको संख्या अनुसार संघको भागवण्डा भएको हो । देशभरिका २ सय ९३ नगरपालिकाका जननिर्वाचित प्रतिनिधिबाट ५ वर्षको लागि नयाँ कार्यसमिति चयन भएको हो ।