स्ववियु निर्वाचन : नीलकण्ठ क्याम्पसमा निर्वाचनको मिति स¥यो,प्रचारप्रसारको अवधि ५ गतेसम्म

धादिङ,०३ चैत ।
धादिङबेशीमा रहेको नीलकण्ठ बहुमुखी क्याम्पसमा स्ववियु निर्वाचनको मिति सरेको छ ।

चैत ५ गते हुने स्वतन्त्र विद्यार्थी युनियन(स्ववियु) निर्वाचनको लागि क्याम्पसमा दर्ता भएका सबै विद्यार्थी संगठनहरुको सहमति तथा क्याम्पस सञ्चालक समितिको अनुमतीमा निर्वाचनको मिति तीन दिन पछि चैत ८ गतेका लागि सारिएको छ ।

साथै निर्वाचनको प्रचारप्रसारको अवधि चैत ५ गते राति १२ बजेसम्म कायम गरिएको नीलकण्ठ बहुमुखी क्याम्पसका क्याम्पस प्रमुख नवराज शर्माले जानकारी दिनुभयो ।

त्रिविको स्ववियु निर्वाचन कार्यतालिका अनुसार आजबाट मौन अवधि सुरु हुने र चैत ५ गते मतदान गर्नुपर्ने थियो । तर,निर्वाचन प्रक्रियामा आपत्ति जनाउदै अनेरास्ववियु, अनेरास्ववियू (क्रान्तिकारी) र प्रजातान्त्रिक विद्यार्थी संगठनले क्याम्पसमा २ पटकसम्म तालाबन्दी गरेका थिए ।

तालाबन्दीपछि नेविसंघ बाहेक अन्य विद्यार्थी संगठनले प्रचारप्रसार पनि गरेका थिएनन् । अहिले प्रचार प्रसार गर्ने समयलाई समेत ध्यानमा राखेर निर्वाचनको मिति सारिएको विद्यार्थी नेताहरुले बताएका छन् ।

नीलकण्ठको स्ववियु सभापतिमा नेवि संघबाट कविराज श्रेष्ठ, अनेरास्ववियुबाट आमोस थापा तामाङ, अनेरास्ववियू (क्रान्तिकारी) बाट श्रीकृष्ण रिजाल, प्रजातान्त्रिक विद्यार्थी संगठनको रोमिका तामाङ चुनावि मैदानमा छन् ।

जिल्लाको अन्य क्याम्पसहरुमा भने त्रिविको स्ववियु निर्वाचन कार्यतालिका अनुसार निर्धारित मितिमा नै मतदान हुनेछ ।