धादिङबेसीमा भोलि युवा सीप,तालिम तथा रोजगार मेला : श्रममन्त्री डिपि अर्यालले उद्घाटन गर्ने

अडियोमा सुन्नुहोस

धादिङ । नीलकण्ठ नगरपालिकाले धादिङबेसीमा भोलि शुक्रबार ‘युवा सीप,तालिम तथा रोजगार मेला’ आयोजना गर्दै छ ।

युवासँग उप–प्रमुख कार्यक्रम अन्तर्गत हुन लागेको मेलाको सम्पूर्ण तयारी पुरा भएको नगरपालिकाका उपप्रमुख दिपक विश्वकर्माले जानकारी दिनुभयो ।

मेलाको उद्घाटन श्रम रोजगार तथा सामाजिक विकास मन्त्री डि.पि अर्यालले गर्नुहुने विश्वकर्माले बताउनुभयो ।

मेलाले रोजगारीको खोजिमा रहेका विविध क्षेत्रका युवाहरुलाई रोजगारदातासँग जोड्न, उधमशीलता तथा स्वरोजगारका अवसरका वारेमा ज्ञान आर्जन गर्न, हातमा सिप हुनेलाई रोजगारीको अवसर प्रदान गर्न, सफल व्यवसायी र विषयविज्ञसँग अन्तरसंवाद गर्न, व्यवसाय दर्ता नविकरण र सञ्चालन सम्वन्धि परामर्श प्रदान गर्न तथा रोजगारी खोज्ने र दिनेहरुकाबीच नवप्रवर्तन र स्वव्यवसाय विकासलाई प्रबर्दन गर्न कोशे ढुङ्गा हुने उपप्रमुख विश्वकर्माले बताउनुभयो ।

मेलाका आकर्षणहरुमा सीपमुलक तालिम दिने संस्थाहरूको स्टल रहने, रोजगारदाताहरूको स्टल रहने, रोजगार लिने र दिने बिचमा साक्षत्कारको अवसर प्रदान गरिने र स्थानीय तथा राष्ट्रिय कलाकारहरूद्वारा विशेष साँस्कृतिक प्रस्तुती पनि रहने उपप्रमुख विश्वकर्माको भनाई छ ।

धादिङबेसीस्थित नीलकण्ठ बाल मन्दिर माविमा हुने मेलामा सरकारी, निजी, गैरसकारी क्षेत्रका रोजगारी, सिप, तालिम, व्यवसाय तथा समग्र श्रम सम्बन्धी १४ ओटा स्टल रहने बताईएको छ ।

यो पनि पढ्नुहोस्

युवा सीप,तालिम तथा रोजगार मेला आयोजना गर्दै नीलकण्ठ नगरपालिका (भिडियो सहित)