धादिङ भलिबल प्रतियोगिता : सिद्धलेक, रुवीभ्याली, गंगाजमुना र खनियाबास सेमिफाईनल प्रवेश

अडियोमा सुन्नुहोस

धादिङ,२२ मंसिर ।
धादिङमा जारी जिल्ला स्तरीय पुरुष भलिबल प्रतियोगिताको क्वाटरफाईनका खेलहरु सम्पन्न भएको छ ।

जिल्ला भलिबल संघ धादिङको आयोजनामा सदरमुकाम धादिङबेशीस्थित कभर्डहल सँगैको खेलमैदानमा हिजोदेखी जारी प्रतियोगिताको दोस्रो दिन आज क्वाटरफाईनका खेल सम्पन्न भएको हो । सिद्धलेक, रुवीभ्याली, गंगाजमुना र खनियाबास गाउँपालिका प्रतियोगिताको सेमीफाइनलमा प्रवेश गरेका छन् ।

पहिलो क्वाटरफाइनल खेलमा नीलकण्ठ नगरपालिकालाई हराउँदै गंगाजमुना गाउँपालिकाले सेमीफाइनलमा स्थान सुरक्षित गरेको हो । त्यसैगरी दोश्रो क्वाटरफाइनल खेलमा ज्वालामुखी गाउँपालिका टिम ए लाई हराउँदै खनियाबास गाउँपालिका सेमीफाइनलमा प्रवेश गरेको छ ।

यस्तै आजै भएको तेस्रो क्वाटरफाइनल खेलमा ज्वालामुखी गाउँपालिका टिम बि लाई हराउँदै सिद्धलेक गाउँपालिका सेमीफाइनलमा प्रवेश गरेको छ भने चौथोे क्वाटरफाइनल खेलमा गल्छी गाउँपालिकालाई हराउदै रुवीभ्याली गाउँपालिकाले समेत सेमीफाइनलमा स्थान सुरक्षित गरेको छ ।

अब फाईनल प्रवेशको लागि भोलि शुक्रबार बिहान ८ बजे गंगाजमुना र खनियाबास गाउँपालिका भिड्ने छन् । दोस्रो सेमिफाईन खेल बिहान १० बजे सिद्धलेक गाउँपालिका र रवीभ्याली गाउँपालिकाबिच हुने जिल्ला भलिबल संघ धादिङका अध्यक्ष अमृत गुरुङ(तिलक)ले जानकारी दिनुभयो । फाईनल खेल दिउँसो २ बजे हुनेछ ।

साथै प्रतियोगिताको समापनमा बागमती प्रदेशका आर्थिक मामिला तथा योजना मन्त्री शालिकराम जम्कट्टेल आउने अध्यक्ष गुरुङले बताउनुभयो । जिल्ला भित्रका ९ वटा टिमको सहभागिता रहेको प्रतियोगिताको बुधबार बागमती प्रदेशका युवा तथा खेलकुद मन्त्री रत्न प्रसाद ढकालले उद्घाटन गरेका थिए ।

प्रतियोगिताको बिजेताले नगद १ लाख १ हजार ११ रुपैँया सहित ट्रफि मेडल र प्रमाणपत्र पाउने छ । त्यस्तै द्धितीय हुने टिमले नगद ५० हजार ५५५ र तृतीय हुने टिमले २० हजार २२२ रुपैँया सहित ट्रफि मेडल र प्रमाणपत्र पाउने छ भने बेष्ट सटर, सर्वर, प्लेयर, ब्लकर र स्पाईकरले ट्रफि र प्रमाणपत्र पाउने जिल्ला भलिबल संघ धादिङका महासचिव विकास कोईरालाले जानकारी दिनुभयो ।