बागमती प्रदेश खेलकुद प्रतियोगिताका लागि खेलाडी छनौटको समय थप

धादिङ,२३ चैत।
दोस्रो बागमती प्रदेश खेलकुद प्रतियोगिताका लागि जिल्ला खेलाडी छनौटको मिति थप गरिएको छ ।

प्रदेश खेलकुद विकास परिषद् बागमतीको आयोजनामा हेटौडामा हुने बागमती प्रदेश खेलकुद प्रतियोगिता २०७९ का लागि खेलाडी छनौटको समय २०८० बैशाख १० गतेसम्म थप गरिएको छ।

परिषद्ले यसअघि यहि चैत २५ गतेभित्र जिल्ला छनौट गरी खेलाडीको नामावली पठाउन पत्राचार गरेको थियो । त्यहीअनुसार बागमती प्रदेशका जिल्लाहरु जिल्ला छनौटमा जुटेका थिए ।

धादिङमा पनि चैत्र २५ गतेदेखी धादिङ जिल्लास्तरीय खेलाडी छनौटको मिति तय भएको थियो । तर प्रदेश खेलकुद परिषद्ले नै छनोट नगर्न आव्हान गरेसँगै खेलाडी छनोट कार्यक्रम स्थगित भएको थियो ।

परिषद्ले समय थप गरेसँगै आगामी बैशाख १० गतेसम्म जिल्ला छनौट गरी खेलाडीको नामावली पठाउने धादिङ जिल्ला खेलकुद विकास समितिका अध्यक्ष प्रताप सिं तामाङले जानकारी दिनुभयो ।

प्रतियोगिताको लागि महिला÷पुरुष दुबैतर्फ बिभिन्न ९ बिधामा खेलाडी छनोट गरिने छ । जसमा भलिबल, तेक्वान्दो, एथ्लेटिक्स, कँराते, आईटिएफ तेक्वान्दो, ब्याडमिन्टन, बक्सिङ, क्रिकेट र फुटबल रहेको तामाङले बताउनुभयो ।