धादिङमा जिल्ला नकआउट फुटबल प्रतियोगिता सुरु : आज यी टिम बिजयी

धादिङ। धादिङमा जिल्ला नकआउट फुटबल प्रतियोगिता आजदेखी सुरु भएको छ।

धादिङ जिल्ला फुटबल संघको आयोजनामा गजुरी गाउँपालिकास्थित गलौदी खेल मैदानमा आजदेखी प्रतियोगिता सुरु भएको हो। प्रतियोगितामा आज ३ खेल भएको एन्फा धादिङका महासचिव रामहरि थापाले बताए।

आजको पहिलो खेलमा सिद्धलेकको अरुणोदय युवा क्लवले थाक्रेको देवाली छाप युवा क्लवलाई ४–३ गोल अन्तरले पराजित गरेको छ । दोस्रो खेलमा बेनीघाट रोराङको हाइवे स्पोर्ट्स क्लवले धार्केको जेसिईलाई ३–२ गोल अन्तरले पराजित गरेको छ ।त्यस्तै तेस्रो खेलमा धुनीबेशीको वच्छलादेवि युवा क्लवले थाक्रेको आहुती युवा क्लवलाई २–१ गोल अन्तरले पराजित गरेको छ ।

यो सँगै बिजयी टिम दोस्रो चरण प्रवेश गरेका छन् भने ३ टिम बाहिरिएका छन्।जिल्ला फुटबल संघ धादिङका कार्यबहाक अध्यक्ष रमेश अधिकारीको सभापतित्वमा भएको उद्घाटन कार्यक्रममा गजुरी गाउँपालिकाका अध्यक्ष गणेशलाल श्रेष्ठको प्रमुख आतिथ्यता रहेको थियो ।

आजै भएको मैत्रिपूर्ण फुटबलमा फुटबल संघले गजुरी गाउँपालिकालाइ ४–३ गोल अन्तरले पराजित गर्दै विजयी भएको छ।यस प्रतियोगितामा जिल्लाका १२ वटा क्लवहरु सहभागी छन्।जसमा नीलकण्ठको धादिङ फुटबल क्लव,सिद्धलेकको अरुणोदय युवा क्लव, पिपलटार युवा क्लव, लालिगुँरास युवा क्लव रहेको छ ।

ज्वालामुखीको शुभारम्भ युवा क्लव, धुनीबेसीको धादिङ जेसिस, संवाहक युवा क्लव र वच्छलादेवि युवा क्लव, बेनीघाट रोराङको हाइवे स्पोर्ट्स क्लव, थाक्रेको देवाली छाप युवा क्लव, आहुती युवा क्लव र गजुरीको मुनाल एकेडेमी रहेको छ ।यो नकआउट प्रतियोगितामा जित्ने टोलीले जिल्ला लिगका लागि स्थान सुरक्षित गर्ने छ ।

लिगका लागि यसअघि नै १० टिम छनोट भईसकेका छन् । नकआउट प्रतियोगिता सकिएपछी लिग सुरु हुने एन्फा धादिङका महासचिव थापाले बताए।