धादिङमा जिल्ला स्तरिय राष्ट्रपति रनिङ शिल्ड शुरु,खेल मैदान निर्माणमा सहयोग गर्ने मन्त्री मोक्तानको प्रतिबद्धता(फोटो र भिडियोसहित)

धादिङ। धादिङ जिल्ला स्तरिय राष्ट्रपति रनिङ शिल्ड प्रतियोगिता शुरु भएको छ ।

जिल्ला खेलकुद विकास समिति धादिङको आयोजनामा धादिङबेसीस्थित कवर्डहल परिसरमा आजदेखी १३ औँ जिल्ला स्तरिय राष्ट्रपति रनिङ शिल्ड प्रतियोगिता शुरु भएको हो ।

प्रतियोगिताको बागमती प्रदेशकी सामाजिक विकास मन्त्री कुमारी मोक्तानले उद्घाटन गर्नुभयो ।

कार्यक्रमलाई सम्बोधन गर्नुहुदैँ मन्त्री मोक्तानले कवर्डहल परिसरमा मैदान निर्माणका लागि सहयोग गर्ने प्रतिवद्धता व्यक्त गर्नुभयो ।

उहाँले खेल क्षेत्रलाई प्रदेशले उच्च प्राथमिकता दिएर काम गरेको भन्दै बागमतीमा खेल क्षेत्रको विकासमा ऐतिहासिक प्रगति हुँदै गएको बताउनुभयो । प्रदेश सरकारले खेल क्षेत्रका पूर्वाधार निर्माणमा उच्च प्राथमिकता दिएको भन्दै खेलाडीहरूका निम्ति यो सुखद् कुरा भएको बताउनुभयो।

खेलकूद क्षेत्रलाई विकास गर्दै लैजान जिल्लाका सबै स्थानीय तहले दृढतापूर्वक लगानी गर्न पनि आग्रह गर्नुभएको छ ।साथै खेलाडीहरुलाई खेल प्रदर्शन गर्दा अनुशासन, गतिशीलता र मर्यादित भएर खेल्न आग्रह गर्नुभएको छ ।

त्यस्तै कार्यक्रममा आफ्नो भनाई राख्दै बागमती प्रदेश सांसद गोविन्द लम्साल, मायादेवी शर्माले जिल्लाको खेल क्षेत्र विकासमा सहयोग गर्ने बताउनुभएको छ ।

खेलकुद विकास समितिका अध्यक्ष प्रताप सिं तामाङको अध्यक्षता तथा मन्त्री मोक्तानको प्रमुख आतिथ्यमा भएको उद्घाटन समारोहमा प्रदेश सांसद लम्साल, शर्मा, जिसस प्रमुख नवराज अधिकारी, गजुरी गाउँपालिका अध्यक्ष गणेशलाल श्रेष्ठ, रुवीभ्याली गाउँपालिका अध्यक्ष रामसिं तामाङ,गंगाजमुना गाउँपालिका अध्यक्ष भक्त लामा, नीलकण्ठ नगरपालिका उपप्रमुख दिपक विश्वकर्मा,प्रमुख जिल्ला अधिकारी बद्रीनाथ गैह्रे, प्रहरी प्रमुख एसपी गौतम मिश्र, पत्रकार महासंघ अध्यक्ष राजाराम शर्मा लगाएतको आतिथ्यता रहेको थियो ।

१६ गतेसम्म सञ्चालन हुने प्रतियोगितामा ३३० पदकका लागि प्रतिष्प्रधा हुने छ।

प्रतियोगितामा महिला र पुरुष दुबै तर्फको भलिबल, कबड्डी, कँराते, तेक्वान्दो, उसु, एथ्लेटिक्सका फिल्ड इभेन्ट्समा हाइजम्प, लङजम्प, ज्याभलिङ थ्रो, सटपुट लगायतका खेलहरू हुने खेलकुद विकास समितिका कार्यालय सचिव रमेशमान तुलाधरले बताउनुभयो ।

प्रतियोगितामा जिल्लाको १३ वटै पालिकाबाट करिव ९५० जना खेलाडीहरु सहभागी भएका छन् । यस प्रतियोगितामा पालिकाबाट छनोेट भएर आएका १८ वर्ष सम्मका छात्र/छात्राहरुले भाग लिन पाउने छन्।जिल्लाबाट छनोट भएका खेलाडीहरु प्रदेश छनोट पार गर्दै राष्ट्रिय प्रतियोगिताको लागि खेल्न पाउने छन्।

यसअघिको १२ औं धादिङ जिल्ला स्तरीय राष्ट्रपति रनिङ शिल्ड प्रतियोगिता नीलकण्ठ नगरपालिकाले जितेको थियो।

हेर्नुहोस् मन्त्री मोत्तानले सम्बोधन गर्नुभएको भिडियो: