नेपाल टि-२०आई सिरिजको फाइनलमा,पिएनजी ८५ रनले पराजित

हङकङमा जारी त्रिकोणात्मक टि२०आई सिरिजको आज भएको खेलमा नेपालले पिएनजीलाई ८५ रनले पराजित गरेको छ ।

नेपालले प्रस्तुत गरेको १ सय ९९ रनको लक्ष्य पछ्याउने क्रममा पिएनजीले १७ औं ओभरमा अलआउट हुनुअघि १ सय १७ रन मात्र जोड्न सक्यो ।

मध्यक्रममा हिरी हिरीले २८ तथा ओपनर टोनी उराले १३ र सेसे बाउले २१ रन जोड्नुबाहेक अन्य ब्याटरले खासै योगदान दिन सकेनन् ।

कुशल भुर्तेलले ४ ओभरमा १२ रन खर्चेर ४ विकेट लिए । उनले कप्तान असद भाला र लेगा सिआकालाई क्याच आउट तथा किप्लिन डोरिगा र नोर्मन भानुआलाई बोल्ड गरेका थिए ।

प्रतिश जिसीले २ तथा आकाश चन्द र गुलशन झाले १/१ विकेट लिएका थिए ।

त्यसअघि पहिलो ब्याटिङको निम्तो पाएको नेपालका लागि ओपनर कुशल भुर्तेल र सन्दीप जोराले अर्धशतक प्रहार गरे । नेपालले २० ओभरमा ६ विकेट गुमाएर १ सय ९८ रन जोड्यो ।

पहिलो विकेटका लागि कुशल र विनोद भण्डारीले ६४ रनको साझेदारी गरे ।  कप्तान रोहित  १ रन, आरिफ शेख  ४ रन जोड्दै विकेटकिपरबाट समातिए ।त्यसपछि कुशल र सन्दीप जोराले ३० बलमा ५० रनको आक्रामक साझेदारी गरे ।

कुशलले १३ औं ओभरको चौथो बलमा गार्डनरलाई छक्का प्रहार गर्दै आफ्नो अर्धशतक पूरा गरे । उनले ३२ बलमा आफ्नो नवौं अर्धशतक बनाएका थिए । सन्दीप जोराले  २१ बलमा आफ्नो दोस्रो टि२०आई अर्धशतक पूरा गरे ।

लोकेश बम ६ बलमा २ छक्कासहित १४ रन जोड्दै १९ औं ओभरको अन्तिम बलमा रनआउट भए ।अन्तिम ओभरमा विवेक यादवले ३ छक्का प्रहार गरेपछि नेपाल बलियो स्कोरसम्म पुग्यो । उनी ४ बलमा १९ रन जोड्दै नटआउट रहे ।

गुलशन झाले १२ बलमा १ छक्कासहित १५ रन बनाए ।पिएनजीका असाद भालाले २ तथा जोन कारिको, नोर्मन भनुआ र नोसेना पोकानाले १(१ विकेट लिए ।

जितसँगै नेपाल सिरिजको फाइनलमा प्रवेश गरेको छ । यस जितले नेपालको २ खेलमा ३ अंक भएको छ ।

हङकङको १ खेलमा १ तथा पिएनजी अंकविहिन छ ।आज हुने लिग चरणको अन्तिम खेलमा पिएनजी र हङकङ खेल्नेछन् । उक्त खेलको विजेताले बुधबार हुने फाइनलमा नेपालसँग खेल्नेछ ।

नेपाल र हङकङबीच पहिलो खेल वर्षाले रद्द भएको थियो ।