गजल: जिब्रोको खुकुरी कसले देखेको छ ?

अडियोमा सुन्नुहोस

मनभित्रको हुरी कसले देखेको छ ?
जिब्रोको खुकुरी कसले देखेको छ ?

हामीसँगै हाँसेको दुनियाँले देख्यो
सम्बन्धको दूरि कसले देखेको छ ?

कसरी बग्यो होला यादहरुको नदी
आँखाको मजबुरी कसले देखेको छ ?

लगाएको आरोप कागजले बोल्यो
भएको मन्जुरी कसले देखेको छ ?

उल्लासको मेलामा हरायो मनुष्य
पीडाको माधुरी कसले देखेको छ ?

लेखकः– द्रुपद अधिकारी-धादिङ,फुलखर्क