बुङचुङ सामुदायिक स्वास्थ्य इकाई : आजदेखी स्वास्थ्यकर्मी सहितको सेवा सुचारु

धादिङ । सिद्धलेक गाउँपालिका–४ मा रहेको बुङचुङ सामुदायिक स्वास्थ्य इकाईमा आजदेखी स्वास्थ्यकर्मी सहितको सेवा सुचारु भएको छ ।

झण्डै दुई सातादेखि स्वास्थ्यकर्मीविहीन र कार्यालय सहयोगीकै भरमा चल्दै आएको स्वास्थ्य इकाईमा आजबाट स्वास्थ्यकर्मी सहितको सेवा सुचारु भएको हो।

उक्त इकाईको अहेव सुवना घले गत साउन २३ गतेदेखि विदामा गएको र अनमी दिपा पराजुली विरामी भएर साउन २९ गतेदेखि विदामा बसेपछि कार्यालय सहयोगी कौशिला सिलवालको भरमा स्वास्थ्य इकाई सञ्चालन हुदै आएको थियो ।

स्थानीयवासीहरूले सामान्य रोगको समेत उपचार गर्न पनि धादिङबेसी वा मलेखु धाउनुपर्ने बाध्यता भोग्नु परेको गुनासो गदै आएका थिए ।

सोहि विषयमा भदौ ११ गते बुधबार सञ्चार माध्यम बागमती कलम डटकममा मा ‘सिद्धलेकको बुङचुङ सामुदायिक स्वास्थ्य इकाई कार्यालय सहयोगीकै भरमा : सेवाग्राहीहरु भन्छन्–सिटामोल धरि पाईदैन’ भन्ने शिर्षकमा समाचार प्रकाशन भएको थियो।

इकाईमा औषधि र स्वास्थ्यकर्मी दुवै नभएको गुनासो सर्वसाधारणले बारम्बार गर्दै आएका थिए । उपचार गर्न आएका विरामीहरु स्वास्थ्यकर्मी नपाएपछि निराश भएर फर्कनुपरेको बताएका थिए ।

घरआँगन नजिकै स्वास्थ्य इकाई देखिए पनि सेवा भने नपाइने सेवाग्राहीहरुको गुनासो थियो ।दुई जना स्वास्थ्यकर्मी रहेको स्वास्थ्य इकाईमा पालैपालो विदा बस्नुपर्ने सेवाग्राहीले माग राखेका थिए ।

कार्यलय सहयोगीको भरमा स्वास्थ्य संस्था छाडेर हिड्ने स्वास्थ्यकर्मी र विदा दिने सरोकारवाला दुवै निकायको चरम लापारबाही रहेको भन्दै सेवाग्राहीले गुनासो गरेका थिए ।

स्थानीयहरुले राखेको मागहरु जायद रहेको भन्दै भदौ १२ गते विहीबारदेखि नै स्वास्थ्यकर्मीसहितको सेवा सुचारु गर्ने सिद्धलेक गाउँपालिकाका प्रमुख प्रशासकीय अधिकृत रामप्रसाद शर्माले बताउनु भए अनुसार नै आजबाट स्वास्थ्यकर्मीसहितको सेवा सुचारु भएको हो ।

इकाईबाट स्वास्थ्यकर्मी सहितको सेवा सुरु भएपछि सेवाग्राहीहरुले खुसी व्यक्त गरेका छन् ।

संरचनागत समस्या समाधान नभएको र औषधि आपूर्ति समेत व्यवस्थित नभएको तर स्वास्थ्यकर्मी तलब भत्ता लिईकनै कार्यालयमा अनुपस्थित रहँदा नागरिक मारमा परेको भन्दै नागरिकहरूले भविष्यमा यस किसिमको लापरबाही नदोहोर्याउन समेत माग गरेका छन् ।

भाडाको घरमा सञ्चालन भइ रहेको बुङचुङ सामुदायिक स्वास्थ्य इकाईमा सिद्धलेक गाउँपालिकाकाको वडा नम्बर १, ४, ५ र ६ का करिव एक हजार घर परिवारले सेवा लिदै आएका छन् ।

यस स्वास्थ्य इकाईमा बुङचुङ, खर्क गैरा, बैरेनी, फाकफुक, स्याखुटार, आपटार, काम्राङ, कत्लेडाँडा, माबिखोला फिस्टार, नयाबस्ती लगायतका ठाउँबाट यस स्वास्थ्य इकाईमा सेवा लिन आउँछन् ।

स्वास्थ्य जस्तो संवेदनशील क्षेत्रमा लामो समयसम्म लापरबाही हुनु नागरिकका लागि गम्भिर विषय हो । तर सेवाग्राहीको निरन्तर गुनासो र दबाबपछि अब स्वास्थ्य इकाईमा स्वास्थ्यकर्मी सहित सेवा सुचारु हुनु स्थानीयका लागि राहत मिलेको छ ।