अन्तराष्ट्रिय धादिङ समाजको अध्यक्षमा पुनःराजन खकुराल,महाधिवेशनबाट धादिङवेशी घोषणापत्र पारित

धादिङ । अन्तराष्ट्रिय धादिङ समाजको अध्यक्षमा पुनःराजन खकुराल(युके) चयन हुनु भएको छ ।

मंगलबार सदरमुकाम धादिङबेसी स्थित क्रिक रिसोर्टमा भएको समाजको तेस्रो महाधिवेशनले अध्यक्षमा पुनःखकुराललाई चयन गरेको हो ।

खकुरालको अध्यक्षतामा २१ सदस्यीय कार्यसमिति सर्वसम्मत चयन भएका हुन् ।

जसको वरिष्ठ उपाध्यक्षमा दिनेश तामाङ (नेपाल), महिला उपाध्यक्षमा सविना थपलिया (अस्ट्रेलिया), खुल्ला उपाध्यक्षमा राजेन्द्र श्रेष्ठ (जापान), बद्री खतिवडा(अमेरीका) चयन हुनुभएको छ ।

यस्तै महासचिवमा बाबुकाजी भण्डारी(जापान), सचिवमा राजेन्द्र थपलिया (द. कोरिया), सचिवमा कल्याण विक्रम कार्की (अष्ट्रेलिया), कोषाध्यक्षमा रामकुमार थापा (नेपाल), सह कोषाध्यक्षमा सोमनाथ कडेंल (कतार) चयन हुनुभएको छ।

यसैगरी सदस्यहरुमा दिपक तिमिल्सिना (युके), पारस भण्डारी(अस्ट्रेलिया), विनोद उप्रेती(अस्ट्रेलिया), कमल दुवाडी(अमेरीका), छन्द प्रसाद सिलवाल (भारत) चयन हुनुभएको छ ।

समाजका अनुसार १ जना महिला उपाध्यक्ष, महिला सविच, प्रवक्ता र ४ जना सदस्य मनोनियत गरिने छ ।

महाधिवेशनको नेपाल सरकारका कृषी तथा पशुपंन्छी विकास मन्त्री रामनाथ अधिकारीले उद्घाटन गर्नुभएको थियो ।

कार्यक्रमलाई सम्बोधन गर्नुहुँदै मन्त्री अधिकारीले विश्वभर छरिएर रहेको धादिङ्गेलीहरुलाई अन्तराष्ट्रिय धादिङ समाजले जोड्नु पर्ने बताउनुभयो ।उहाँले प्रवासमा रहेका धादिङ्गेलीहरुले जिल्लामा परेका समस्या पहिचान गरी सहयोग गर्नुपर्ने बताउनुभयो ।

महाधिवेशनले धादिङवेशी घोषणापत्र पनि पारित गरेको छ ।

विश्वका जुनसुकै देशमा प्रभावकारी सञ्जाल तयार, संयन्त्र निर्माण एवं समन्वय गरि अप्ठेरोमा परेकाआप्रवासी धादिङेलीहरुको सहयोग, उद्धार र पुनस्र्थापनाका लागि आवस्यक पहल कदमी गर्ने,विश्वका विभिन्न देशमा महत्वपुर्ण योगदान, ब्यवसायीक दक्षता र उदाहरणीय काम गरिरहेका धादिङेलीहरुको प्रोफाइल तयार गरि उनीहरुको ज्ञान, अनुभव र श्रोतलाई जिल्लाको विकास अभियानमा जोड्न आवश्यक समन्वयकारी भूमिका निर्वाह गर्ने लगाएतको ९ बुँदे धादिङवेशी घोषणापत्र पारित गरेको हो।

महाधिवेशनमा विश्वका १४ देशमा रहेका धादिङ्गेलीहरु मध्येबाट एक सय २५ जना भन्दा बढि प्रतिनीधी सहभागी थिए ।

महाधिवेशनको लागि १४ देशबाट सहभागी भएको र ४ देशबाट प्रतिनिधि नआएको अध्यक्ष खकुरालले बताउनुभयो । भौतीक उपस्थिति जनाउन नसकेका प्रतिनीधिहरु भर्चुअल माध्यमबाट जोडिएको उहाँको भनाई छ ।

अन्तराष्ट्रिय धादिङ समाजको १८ देशमा राष्ट्रिय समन्वय परिषदको शाखा विस्तार भएको छ।

२०७४ साल असोज १६ धादिङबेसीमा भुवन गुरुङ संयोजकत्वमा सम्पन्न पहिलो भेलाले अन्तराष्ट्रिय धादिङ समाज तदर्थ समिति गठन गर्ने निर्णय गरेको थियो जस अनुरुप ०७४ असोज ३१ (अक्टोबर १७) मा धादिङबेसीमा सम्पन्न भेलाले नानुकाजी अर्याल अध्यक्ष रहेको तदर्थ समिति बनेको थियो।

त्यसपछि अन्तर्राष्ट्रिय धादिङ समाजको विश्व भेला तथा प्रथम अधिवेशन २०७६ असोज २७ गते काठमाडौमा सम्पन्न भएको थियो।

उक्त अधिबेशनबाट अध्यक्षमा पुनः नानुकाजी श्रेष्ठ चयन हुनुभएको थियो भने तेस्रो कार्यकालको लागि २०७८ असोज २४ गते भएको दोस्रो अधिवेशनमा अध्यक्षमा राजन खकुराल चयन भएको हुनुभएको थियो।

अन्तर्राष्ट्रिय धादिङ समाजले जिल्लामा विभिन्न क्षेत्रमा सहयोग गर्दै आईरहेको छ ।

यस्तो छ,अन्तराष्ट्रिय धादिङ समाजको तेश्रो महाधिवेशनबाट पारित धादिङवेशी घोषणापत्र

प्रवासीहरुको संगठीत अभियानः समृद्ध धादिङ हाम्रो स्वाभिमान्ः भन्ने मूल नारा सहित धादिङवेशीमा सम्पन्न अन्तराष्ट्रिय धादिङ समाजको तेश्रो महाधिवेशन भब्य रुपमा सफल पार्न आफ्नो उपस्थिति एवं सक्रिय संलग्नता जनाउने प्रमूख अतिथि ज्यू, विशिष्ट अतिथिज्यूहरु, विभिन्न राजनीतिक दल, विज्ञहरू, संघ,संस्था, सञ्चारकर्मी, एवं सम्पूर्ण सौजन्यकर्ताहरुप्रति आयोजक मूल समिति, संरक्षक तथा पदाधिकारी एवं विश्वका १८ देशका धादिङगेलीहरुको राष्ट्रिय समन्वय परिषद् बाट प्रतिनीधित्व गर्ने सवै प्रतिनिधिहरुको तर्फबाट हार्दिक कृतज्ञता ज्ञापन गर्दछौँ । धादिङ जिल्ला र विश्वभर छरिएका गैरआवासीय धादिङेलीहरु बीचको भावनात्मक सम्बन्धलाई सुमधुर बनाउँदै सहकार्य, समन्वय र विशुद्ध सामाजिक अभिप्रायका साथ धादिङ जिल्लाको समग्र विकासमा योगदान गर्ने उद्देश्यका साथ स्थापित अन्तर्राष्ट्रिय धादिङ समाजको तेश्रो महाधिवेशनले नयाँ कार्यसमिति चयन गर्दै संस्थाको मार्गदर्शन र प्रतिवद्धताका लागि यो धादिङवेशी घोषणापत्र जारी गरेको छ ।

१. विश्वभर छरिएर रहेका धादिङेलीहरुलाई संगठित गर्दै भावनात्मक एकता सहितको विशुद्ध सामाजिक, गैह्र राजनीतिक र मानवीय सहायतामूखी साझा संस्थाको रुपमा अन्तराष्ट्रिय धादिङ समाजलाई अबिच्छिन्न रुपमा स्थापित गर्ने प्रतिबद्धता ब्यक्त गर्दछौँ ।
२. यो महाधिवेशन धादिङ जिल्लाको समग्र विकासमा प्रतिबद्ध हुँदै धादिङवासीको आर्थिक समृद्धिका लागि सामूहिक तथा व्यक्तिगत लगानी गर्न उपयुक्त वातावरण सिर्जना गर्न आव्हान गर्दै धादिङ जिल्लामा हुने पुर्वाधार विकास र सामाजिक उद्धमका क्षेत्रमा लगानी गर्ने प्रतिबद्धता ब्यक्त गर्दछ।
३. विश्वका जुनसुकै देशमा प्रभावकारी सञ्जाल तयार, संयन्त्र निर्माण एवं समन्वय गरि अप्ठेरोमा परेका आप्रवासी धादिङेलीहरुको सहयोग, उद्धार र पुर्नस्थापनाका लागि आवस्यक पहल कदमी गरिनेछ ।
४. नेपालको संविधानमा व्यवस्था भै नागरिकता ऐन शंसोधनबाट भएको गैरआवासीय नेपाली नागरिकता कार्यान्वयनमा देखिएका समस्याहरुको तत्काल समाधान गरि आप्रवासीहरुको मातृभूमिप्रतिको अगाध प्रेम, कर्तब्य र लगानी सम्मान गर्न नेपाल सरकार समक्ष यो महाधिवेशन अनुरोध गर्दछ।
५. वैदेशिक रोजगारीबाट प्राप्त हुने विप्रेशणले मुलुकको अर्थतन्त्रलाई ठूलो योगदान दिइरहेकाले धादिङ जिल्लमा भित्रिने विप्रेशणलाई उत्पादनमूलक क्षेत्रमा लगानीहुने बातावरण तयार गर्न एवं वैदेशिक रोजगारलाई सुरक्षित, न्यायपूर्ण ,मर्यादित र व्यवस्थित बनाउँन धादिङका सवै स्थानीय सरकार संग सुरक्षित बैदेशिक रोजगार र वित्तीय सचेतना कार्यक्रम प्रभावकारी रुपमा सञ्चालन गर्न यो महाधिवेशन अपिल गर्दछ ।
६.धादिङका विकट र विपन्न समुदायका बालबालिकाहरुको शिक्षाको अधिकार सुनिश्चित गर्न विभिन्न देशका धादिङवासीहरु र समन्वय समिति संग सहकार्य गरि जेहन्दार विद्यार्थी छात्रबृत्री कोष स्थापना गर्ने प्रतिबद्धता गर्दछौँ ।
७. विपन्न धादिङवासीको स्वास्थ उपचारमा सहयोग गर्न एक स्वास्थ उपचार सहायता कोष स्थापना गरिनेछ । विभिन्न पालिका र संघसंस्थाहरु संग सहकार्य गरि स्वास्थ शिविर र स्वास्थ सचेतना कार्यक्रम सञ्चालन गर्ने प्रतिबद्धता गर्दछौँ ।
८. विश्वब्यापी महामारीको रुपमा आएको कोभिड-१९ का बेला धादिङका स्थानीय सरकार र संघसंस्थाहरु संग सहकार्य गरि गरिएको राहत तथा सहायता अभियानबाट प्राप्त अनुभवबाट सिक्दै जिल्लामा हुने कुनै पनि विपद् तथा महामारीहरुमा मानवीय सहायताका लागि यथासक्य सहयोग गर्ने प्रतिवद्धता गर्दछौँ ।
९. विश्वका विभिन्न देशमा महत्वपुर्ण योगदान, ब्यवसायीक दक्षता र उदाहरणीय काम गरिरहेका धादिङेलीहरुको प्रोफाइल तयार गरि उनीहरुको ज्ञान, अनुभव र श्रोतलाई जिल्लाको विकास अभियानमा जोड्न आवस्यक समन्वयकारी भूमिका निर्वाह गर्ने प्रतिवद्धता गर्दछौँ ।
मिति:२०८१ आश्वीन २२