चार पालिकामा आज सार्वजनिक बिदा

आज बैतडीका चार स्थानीय तहले सार्वजनिक बिदा दिएका छन्।

विभिन्न शक्तिपीठ तथा मन्दिरहरुमा लाग्ने जात्राको अवसरमा दशरथचन्द नगरपालिका, मेलौली नगरपालिका, शिवनाथ गाउँपालिका र सुर्नया गाउँपालिकाले स्थानीय सार्वजनिक बिदा दिएका हुन्।

सार्वजनिक बिदाका दिन पालिकाभित्रका सरकारी तथा गैरसरकारी निकाय, शिक्षण संस्था, बैंक तथा बित्तीय संस्था लगायतमा बिदा रहने उल्लेख छ। ​

मेलौली नगरपालिका र शिवनाथ गाउँपालिकाले बिहीबार पनि बिदा दिएका थिए।

दशरथचन्द नगरपालिकाले नगरपालिका-४ स्थित प्रसिद्ध जगन्नाथ मन्दिर, वडा नं ११ सीमस्थित ग्वाल्लेक केदार मन्दिर र दनपा- १ सतपालीस्थित दानेश्वर नागार्जुन मन्दिरमा जात्रा लाग्ने भएकाले शुक्रबार सार्वजनिक बिदा दिएको हो।

यस्तै मेलौली नगरपालिकाले वडा नं.१ स्थित प्रसिद्ध मेलौली भगवती मन्दिरमा लागेको जात्राको अवसरमा बिहीबार र शुक्रबार बिदा दिएको छ भने शिवनाथ गाउँपालिकाले वडा नं.४ स्थित प्रसिद्ध देहीगडा भगवती मन्दिरमा लागेको जात्राको अवसरमा बिदा दिएको हो ।

यस्तै सुर्नया गाउँपालिकाले वडा नं.५ बरायलस्थित फाल्ङाशैनी भगवती मन्दिरमा लागेको जात्राको अवसरमा शुक्रबार सार्वजनिक बिदा दिएको जनाएको छ।