मगर बिद्यार्थी फुटसलको उपाधी पुरुषतर्फ शंकरदेव र महिलातर्फ महेन्द्ररत्नलाई

काठमाडौं। मैत्रीपूर्ण फुटसल प्रतियोगिताको उपाधी नेपाल मगर विद्यार्थी संघ शंकरदेव क्याम्पस समितिले जितेको छ ।

मगर विद्यार्थी संघ बागमती प्रदेश समितिको आयोजनामा भएको प्रथम मैत्रीपूर्ण फुटसल प्रतियोगिता अन्तरगत मंगलबार डि.आइ.जी. फुटसल नयाँ नैकापमा भएको फाईनलमा ने.म.बि.स. विश्वभाषा क्याम्पस समितिलाइ ४–१ होल अन्तरले पराजित गर्दै नेपाल मगर विद्यार्थी संघ शंकरदेव क्याम्पस समितिले उपाधी जितेको हो ।

उपाधी संगै शंकरदेवले नगद पन्ध्र हजार सहित मेडल र प्रमाणपत्र प्राप्त गर्यो भने उपबिजेता बनेको विश्वभाषा क्याम्पस समितिले नगद आठ हजार सहित मेडल र प्रमाणपत्र पाएको छ ।

महिला तर्फको उपाधि भने नेपाल मगर विद्यार्थी संघ महेन्द्ररत्न क्याम्पस समिति ताहाचलले जितेको छ । महेन्द्ररत्नले ने.म.बि.स. त्रिचन्द्र क्याम्पस समितिलाई पराजित गर्दै उपाधी रक्षा गरेको हो ।

प्रतियोगितामा पुरुषतर्फ बाह्र र महिला तर्फ तिन टिम सहभागी थिए ।

पुरुषतर्फ उत्कृष्ट गोलकिपर शंकरदेव क्याम्पस समितिका शैलेन्द्र मगर घोषित भए भने उत्कृष्ट खेलाडी शंकरदेव कै सुरज मगर घोषित भए । उत्कृष्ट गोलकिपर र खेलाडिहरूलाइ नगद रु एक हजार र मेडलले सम्मान गरिएको थियो ।

प्रतियोगितामा अनुशासित टिमको उपाधी भने आयोजक ने.म.बि.स. बागमती प्रदेश समितिलाइ दिइएको थियो।

कार्यक्रममा प्रमुख अतिथि प्रतिनिधि सभा सदस्य माननीय रण कुमारी मगरले मगर विद्यार्थी एकजुट भएर उदाहरणिय काम गरेकोमा आयोजकको प्रसंसा गर्दै आगामी दिनमा पनि यस्तै कार्यक्रमलाई निरन्तरता दिन आग्रह गर्नुभयो ।

प्रतियोगितामा नेपाल मगर विद्यार्थी संघ केन्द्रिय समितीका अध्यक्ष चित्रबहादुर पुलामी मगर, मगर विद्यार्थीकै पूर्व नेता तथा अनेरास्ववियु केन्द्रिय समितीका उपाध्यक्ष नारायण घर्ती, नेपाल खेलकुद महासंघका बागमती प्रदेश अध्यक्ष सिताराम कार्की लगायतका अतिथिहरुको उपस्थितीमा कार्यक्रम सम्पन गरिएको आयोजक समितिका सचिव तारा तुम्सिङ मगरले बताउनुभयो।

प्रतियोगितालाइ हाईभिजन ल्याण्ड हाउजिङ एण्ड ट्रेडर्स प्रा.लि. चन्द्रागिरिले मुख्य प्रायोजन गरेको भने सह–प्रायोजकमा हाइ टिज इअरकोन एण्ड ईन्जिनियरिङ् प्रालि कमलपोखरी र निम एजुकेशन कन्सल्टेन्सी कुमारीपाटी रहेको थियो ।