पहिरोले धादिङको किचेत गाउँका ५ घर बिस्थापित,२० घर जोखिम

धादिङ । उत्तरी धादिङको गंगाजमुना गाउँपालिका–१ किचेत गाउँमा पहिरोका कारण ५ घर बिस्थापित भएका छन् ।

गाउँनजिक तिनतिरबाट पहिरो गएपछि गाउँ नै जोखिममा परेको छ । वर्षाका कारण जमिन गलेपछि पहिरो जान सुरु भएको हो। आइतबार राती गाउँ भन्दा तल पहिरो सुरु भएको र केही घर भत्किन थालेको स्थानीय सामाजिक कार्यकर्ता पूर्ण तामाङले जानकारी दिनुभयो ।

गाउँमा २० घर रहेको र एक आपसमा जोडिएको घर भएको गाउँ भएकोले पहिरो सुरु भएपछि गाउँनै जोखिममा परेको घटनास्थलबाट तामाङले बताउनुभयो ।

विस्थापितहरु छिमेकीको घरमा बसेका छन् । गाउँनै जोखिम भएकोले गाउँबासीलाई राख्ने ठाउँमा त्रिपाल समेत व्यवस्था नभएको गुनासो गरेका छन् ।

अहिले पनि पानी परिरहेको छ । केहीबेर रोकिने र पानी पर्ने भइरहेकोले नागरिकहरु डराइरहेका छन् । पहिरो लड्ने सम्भावना भएको साविकको रि गाविसमा पर्ने रिचेत, ताजिम्राङ लगायतका गाउँ पुग्न समेत कठिन भएको वडा अध्यक्ष बहादुरसिंह तामाङले बताउनुभयो ।

धादिङबेसीबाट करिब ४० किलोमिटर दुरीमा रहेको पहिरो प्रभावित क्षेत्रमा सवारीसाधन समेत पुग्न सक्ने अवस्था छैन वर्षाले गाउँपुग्ने सडक ठाउँठाउँमा पहिरो गएका कारण हिडेर जानुपर्ने अवस्था आएको छ ।