धादिङमा बजार अनुगमन जारी:आठ व्यवसायी कारबाहीमा परे,१ लाख ३० हजार जरिवाना

धादिङ। धादिङमा बजार अनुगमन जारी छ।जिल्ला अनुगमन समितिले चाडपर्वलाई लक्षित गर्दै जिल्लाभर अनुगमनलाई तिव्र पारेको छ।

मंगलबार जिल्ला अनुगमन समितिले धुनीवेसी नगरपालिका क्षेत्रका बिभिन्न खाजा,खाना तथा होटलमा अनुगमन गरि जरिवाना तिराएको छ।

अनुगमनको क्रममा हाईवे किङस फास्टफुड एण्ड रेष्टुरेन्टलाई ५ हजार, मंगोलियन फास्टफुडलाई १५ हजार, आधिखोला होटललाई २५ हजार र के वि खाजाघरलाई ५ हजार जरिवाना तिराईएको अनुगमन समितिले जनाएको छ।

यस्तै होटल काष्ठमण्डपलाई २५ हजार, न्यु विश्वासलाई २५ हजार, खाना खजनालाई १५ हजार र रोशनी एण्ड रोहन खाजा घरलाई ५ हजार जरिवाना तिराईएको छ ।

कारबाहीमा परेको होटलहरुले सरसफाईमा ध्यान नदिएको, फोहर खानेकुरा बिक्रि गरेको, खानेकुरा छोपेर नराखेको, खानामा झिँगा भन्किएको भेटिएपछी उपभोक्ता संरक्षण ऐन २०७५ को उपदफा ३९ को १ को क अनुसार जरिवाना तिराइएको जनाएको छ।

होटल फोहोर भएको, खानेकुरामा फोहोर पर्ने गरि राखेको, होटलसँग भएको कोल्ड स्टोर दर्ता नगरी संचालन गरेको र खानेकुराको मूल्या बढी लिएको गुनासोको आधारमा होटलहरुको अनुगमन गरिएको थियो ।

चाडपर्वको समयमा बजारमा पाइने सामानहरुको अत्याधिक मूल्य लिने, उपभोक्ता ठगिने कारणले नागरिकहरु समस्यामा पर्ने भएपछि नागरिकहरुको आग्रह र उजुरीको आधारमा निरन्तर अनुगमन भइरहेको छ।