गणेश हिमालको आधार शिविर नजिक कर्मचारीसहितको टोली फस्यो,दुई जना बिरामी,हेलिकप्टरबाट उद्धारको प्रयास

काठमाण्डौ । गणेश हिमालको आधार शिविर नजिक कर्मचारीसहितको टोली फसेको छ।

पर्या–पर्यटन प्रवर्द्धनको उद्देश्यले यात्रामा रहेको धादिङको रुविभ्याली गाउँपालिका, डिभिजन वन कार्यालय र पत्रकारको टोली आधार शिविर नजिक फसेका छन् ।

टोलीमा रहेकामध्ये डिभिजन वन कार्यालय धादिङका प्रमुख विष्णुप्रसाद आचार्य र रेञ्जर अनुसुया ढुङ्गाना बिरामी पर्नुभएको छ।

टोलीमा रहेका ३/४ जना हिजो बेलुका सम्पर्क हुने ठाउँमा आइपुगेको र अरु १०/११ जना फसेका धादिङका सहायक प्रमुख जिल्ला अधिकारी युवराज अर्यालले जानकारी दिनुभयो।

बिरामी र फसेकाहरूलाई उद्धार गर्न हिजो गएको नेपाली सेनाको हेलिकप्टर मौसम खराब भएपछि फर्किएको छ।उद्धारका लागि हेलिकप्टर आज बिहान फेरि जाने र मौसम अनुकुल भएमा उद्धार हुने उहाँले बताउनुभयो ।

टोली केही दिनदेखि यात्रामा थिए।त्यस ठाउँमा बस्ती नभएको र सञ्चार सम्पर्क पनि हुन नसक्दा समस्या भइरहेको सहायक प्रमुख जिल्ला अधिकारी अर्यालले बतानुभयो ।