धादिङमा रास्वपाको ऐतिहासिक ‘क्लिन स्वीप’ : दुईवटै क्षेत्रमा भारी मतान्तरले विजयी

धादिङ- धादिङका दुवै प्रतिनिधिसभा निर्वाचन क्षेत्रमा राष्ट्रिय स्वतन्त्र पार्टी (रास्वपा) ले ऐतिहासिक जित हात पारेको छ।

लामो समयदेखि एमाले, कांग्रेस र अन्य बामपन्थी दलको प्रभाव रहेको धादिङमा यसपटक रास्वपाले अप्रत्याशित सफलता हासिल गर्दै राजनीतिक समीकरण नै बदलिदिएको छ।

धादिङ निर्वाचन क्षेत्र नम्बर १ मा राष्ट्रिय स्वतन्त्र पार्टीकी उम्मेदवार आशिका तामाङ ३९ हजार १२८ मतसहित विजयी हुनुभएको छ। उहाँको निकटतम प्रतिस्पर्धी नेकपा एमालेका भूमि त्रिपाठी ले १५ हजार ०३१ मत प्राप्त गर्नुभएको छ।

यसैगरी नेपाली कम्युनिस्ट पार्टीका राजेन्द्र पाण्डे ले १४ हजार ७०९ मत प्राप्त गर्दा नेपाली कांग्रेसका कृष्ण रिजाल ले १० हजार ०८० मत प्राप्त गर्नुभएको छ।

२०७४ सालको निर्वाचनमा यस क्षेत्रबाट नेकपा एमालेका भूमि त्रिपाठी विजयी हुनुभएको थियो भने २०७९ को निर्वाचनमा तत्कालीन नेकपा (एकीकृत समाजवादी) का राजेन्द्र पाण्डे विजयी हुनुभएको थियो।

दशकौँदेखि बामपन्थी किल्लाका रूपमा परिचित यस क्षेत्रमा यसपटकको नतिजाले नेपाली राजनीतिमा नयाँ र अप्रत्याशित मोड ल्याएको विश्लेषण गरिएको छ।

पहिलो पटक संसदीय चुनावी प्रतिस्पर्धामा उत्रिएकी रास्वपाकी उम्मेदवार आशिका तामाङले स्थापित नेताहरूलाई पछि पार्दै धादिङको चुनावी परिणामलाई नै उथलपुथल बनाइदिएकी छन्।

धादिङ निर्वाचन क्षेत्र नम्बर १ अन्तर्गत धुनिबेशी नगरपालिका, थाक्रे गाउँपालिका, गल्छी गाउँपालिका, गजुरी गाउँपालिका, बेनीघाट रोराङ गाउँपालिका र सिद्धलेक गाउँपालिका पर्दछन्।

उता धादिङ निर्वाचन क्षेत्र नम्बर २ मा पनि राष्ट्रिय स्वतन्त्र पार्टीकै उम्मेदवार बोध नारायण श्रेष्ठ विजयी हुनुभएको छ। उहाँले २६ हजार १४५ मत प्राप्त गर्दै जित निकाल्नुभएको हो।

उहाँका निकटतम प्रतिद्वन्द्वी नेपाली कांग्रेसका रमेश धमला ले २० हजार २७९ मत प्राप्त गर्नुभएको छ। त्यस्तै नेकपा एमालेका धन बहादुर घले ले १० हजार ०८४ मत प्राप्त गर्दा नेपाली कम्युनिस्ट पार्टीका राम बहादुर भण्डारी ले ९ हजार ०३६ मत प्राप्त गर्नुभएको छ।

एमाले र कांग्रेसकै गढ मानिने धादिङ क्षेत्र नम्बर २ मा रास्वपाका उम्मेदवार श्रेष्ठ ५ हजार ८६६ मतान्तरले विजयी हुनुभएको हो।

धादिङ निर्वाचन क्षेत्र नम्बर २ अन्तर्गत रुवीभ्याली गाउँपालिका, गङ्गाजमुना गाउँपालिका, खनियाँबास गाउँपालिका, नेत्रावती डबजोङ गाउँपालिका, त्रिपुरासुन्दरी गाउँपालिका,ज्वालामुखी गाउँपालिका र नीलकण्ठ नगरपालिका पर्दछन्।

यस निर्वाचन क्षेत्रमा २०७० मा नेकपा एमालेका धनबहादुर घले, २०७४ मा खेम प्रसाद लोहनी र २०७९ मा नेपाली कांग्रेसका रामनाथ अधिकारी विजयी भएका थिए।