ज्वालामुखी गाउँपालिकाद्धारा ५७ करोड ९० लाख बढी बजेट सार्वजनिक,कुन क्षेत्रमा कति बजेट ?

धादिङ । धादिङको ज्वालामुखी गाउँपालिकाले आर्थिक वर्ष २०८३/८४ का लागि रु ५७ करोड ९० लाखबढिको बजेट सार्वजनिक गरेको छ ।

शनिबार गाउँपालिकाले १७ औ गाउँसभा मार्फत नीति तथा कार्यक्रम र अनुमानित आय व्यय सार्वजनिक गरेको हो ।

गाउँपालिका उपाध्यक्ष धर्म बहादुर अर्यालले प्रस्तुत गर्नुभएको आर्थिक वर्ष २०८३/८४ को कुल बजेट रु ५७ करोड ९० लाख ५२ हजार २ सय रहेको छ ।

जसमा चालुतर्फ ४३ करोड ७५ लाख २ हजार २ सय रहेको छ भने पूँजीगत तर्फ १४ करोड १५ लाख ५० हजार रहेको छ ।

उपाध्यक्ष अर्यालका अनुसार क्षेत्रगत विनियोजित बजेटमा आर्थिक विकास तर्फ ९९ लाख ५० हजार, सामाजिक विकास तर्फ ५ करोड १० लाख २३ हजार २ सय, पूर्वाधार विकास तर्फ १४ करोड १५ लाख ५० हजार, सुशासन तथा अन्तर सम्बन्धित तर्फ ५६ लाख र कार्य संचालन तथा प्रशासनीक तर्फ ८ करोड १५ लाख ७९ हजार विनियोजन भएको छ ।

आगामी आ.वको लागि गाउँपालिकालाई संघीय सरकारवाट समानिकरण अनुदान १२ करोड ९१ लाख, सशर्त अनुदान २२ करोड ९६ लाख, विशेष अनुदान १ करोड ३१ लाख, र समपुरक अनुदान ५० लाख गरि कुल रु ३७ करोड ६८ लाख प्राप्त भएको छ ।

त्यसैगरी बागमती प्रदेश सरकारवाट समानीकरण अनुदान १ करोड १९ लाख ६६ हजार, सशर्त अनुदान २ करोड १ लाख ७७ हजार ९ सय, विशेष अनुदान ७० लाख र समपुरक अनुदान २ करोड गरि कुल रु ६ करोड ७ लाख ४५ हजार प्राप्त भएको गाउँपालिकाले जनाएको छ ।

बजेटमा भौतिक पूर्वाधार निर्माण, कृषि, शिक्षा, स्वास्थ्य, पर्यटन, सामाजिक विकास,सामाजिक समावेशीकरण सम्बन्धी नीति,राजस्व तथा आन्तरिक स्रोत परिचालन लगायत क्षेत्रलाई विशेष प्राथमिकता दिएको छ ।

गाउँपालिका अध्यक्ष यामनाथ दनैले नीति तथा कार्यक्रम प्रस्तुत गर्दै स्थानीय आवश्यकता र जनचाहनालाई केन्द्रमा राखेर बजेट तर्जुमा गरिएको बताउनुभयो ।

बजेटले भौतिक पूर्वाधार विस्तार, शिक्षा, स्वास्थ्य, कृषि तथा सामाजिक क्षेत्रको सुदृढीकरणसँगै सेवा प्रवाहलाई थप प्रभावकारी बनाउने लक्ष्य लिएको अध्यक्ष दनैको भनाई थियो ।

गाउँसभाले गाउँपालिकामा कार्यरत करार कर्मचारीहरूको करार अवधि थप ६ महिनाका लागि नवीकरण गर्ने निर्णय गरेको प्रमुख प्रशासकीय अधिकृत हरेराम शाहले जानकारी दिनुभयो ।

गाउँसभाको अवसरमा शैक्षिक क्षेत्रको विकासमा योगदान पुर्‍याउने विद्यालयलाई गाउँपालिकाले सम्मान गरेको छ। गएको एसइइ परीक्षामा शत प्रतिशत नतिजा हासिल गरेको सुनखानी माध्यमिक विद्यालयलाई नगद रु २ लाख सहित सम्मान गरेको हो।

त्यस्तै गाउँपालिकाका १९ जना कर्मचारी, स्वास्थ्य स्वयंसेविका, विद्यार्थी तथा विद्यालयहरुलाई पनि सम्मान गरिएको छ ।