त्रिपुरासुन्दरी गाउँपालिकाको कार्यालयमा ताला लगाएर काममा अवरोध गर्ने एक व्यक्ति पक्राउ

धादिङ । धादिङको त्रिपुरासुन्दरी गाउँपालिकाको कार्यालयमा कर्मचारीहरू कामकाज गरिरहेको अवस्थामा अभद्र व्यवहार गर्दै कार्यालयको लेखा शाखामा बाहिरबाट ताला लगाई काममा अवरोध गरेको आरोपमा एक व्यक्ति पक्राउ परेका छन्।

पक्राउ पर्नेमा त्रिपुरासुन्दरी गाउँपालिका–३ निवासी ४९ वर्षीय सुरेन्द्र वाँडा रहेको जिल्ला प्रहरी कार्यालय धादिङका सूचना अधिकारी डिएसपी प्रकाश दाहालले जानकारी दिनुभयो।

प्रहरीका अनुसार असार ९ गते बिहान करिब १०ः३० बजे गाउँपालिकाको कार्यालय पुगेका वाँडाले भुक्तानी सम्बन्धी रीत नपुगेको फाइल पेश गरी विवाद सिर्जना गरेका थिए।

उनले कार्यालयका कर्मचारीहरूलाई गालीगलौज तथा धम्की दिँदै अभद्र व्यवहार गरेको आरोप छ।

केही समयपछि उनी मादक पदार्थ सेवन गरी ताला र चाबी लिएर पुनः कार्यालय पुगेका र गाउँपालिकाको लेखा शाखामा प्रमुख प्रशासकीय अधिकृत र लेखा अधिकृत काम गरिरहेको अवस्थामा बाहिरबाट ताला लगाई कार्यालयको नियमित कामकाजमा बाधा पुर्‍याएको प्रहरीले जनाएको छ।

गाउँपालिकाको पत्र जाहेरीका आधारमा प्रहरीले वाँडालाई सोही दिन पक्राउ गरी अभद्र व्यवहार सम्बन्धी मुद्दा दर्ता गरि थप अनुसन्धान भइरहेको डिएसपी दाहालले बताउनुभयो ।