धादिङको नृसिंहधाम: महामहोत्सवमा ४ करोड ४४ लाख भन्दा बढी सङ्कलन,३३ लाख भक्तजनले गरे दर्शन

धादिङ- धादिङको त्रिपुरासुन्दरी गाउँपालिका-१ मा रहेको नृसिंहधाममा आयोजित पुरुषोत्तम महामहोत्सवबाट ४ करोड ४४ लाख ४२ हजार ८ सय ९९ रुपैयाँ दान सङ्कलन भएको छ।

महामहोत्सव सम्पन्न भएपछि शनिबार आयोजित पत्रकार सम्मेलनमा नृसिंहधाम विकास समितिले आय-व्यय विवरण सार्वजनिक गरेको हो।

समितिका कोषाध्यक्ष विष्णुहरी उप्रेतीका अनुसार नगद तथा अन्य माध्यमबाट ३ करोड ९७ लाख ३७ हजार ८ सय ९९ रुपैयाँ दान सङ्कलन भएको थियो भने ४७ लाख ५ हजार रुपैयाँ प्रतिबद्धता प्राप्त भएको छ।

यससँगै कुल सङ्कलन रकम ४ करोड ४४ लाख ४२ हजार ८ सय ९९ रुपैयाँ पुगेको उहाँले जानकारी दिनुभयो।

महामहोत्सव सञ्चालनका क्रममा १ करोड ५५ लाख ८१ हजार ३५ रुपैयाँ खर्च भएको छ।

खर्च कटाउँदा २ करोड ८८ लाख ६१ हजार ८ सय ६४ रुपैयाँ बचत रहेको समितिले जनाएको छ।

पत्रकार सम्मेलनमा सार्वजनिक गरिएको खर्च विवरणबारे सञ्चारकर्मीहरूले विभिन्न जिज्ञासा समेत राखेका थिए।

सञ्चार क्षेत्रमा ३२ लाख रुपैयाँ, इन्टरनेट सेवामा १ लाख ४६ हजार रुपैयाँ तथा स्टेशनरीमा ५९ हजार ७ सय ५० रुपैयाँ खर्च भएको विवरण सार्वजनिक भएपछि खर्चको औचित्यबारे प्रश्न उठाइएको थियो।

एउटै टेलिभिजन संस्थालाई २६ लाख रुपैयाँसम्म भुक्तानी गरिएको तर धादिङका स्थानीय सञ्चारमाध्यमहरूलाई पर्याप्त रूपमा समेट्न नसकेक भन्दै पत्रकारहरूले गुनासो गरेका थिए।

वैदिक सनातन परम्परा अनुसार भगवान् नृसिंहदेवका १२ प्रमुख पीठमध्ये नेपालमा रहेको एकमात्र पीठका रूपमा परिचित बुढीगण्डकी र नेत्रावती नदीको संगमस्थलमा रहेको नृसिंहधाममा पुरुषोत्तम महिनाको अवसर पारेर जेठ महिनाभर महामहोत्सव सञ्चालन गरिएको थियो।

महोत्सव अवधिभर धादिङसहित नेपालका विभिन्न जिल्लाका साथै छिमेकी भारत र अन्य मुलुकहरूबाट समेत ठूलो सङ्ख्यामा भक्तजनहरू दर्शनका लागि पुगेका थिए।

नृसिंहधामका पीठाधीश डा. श्रीवास कृष्णदास ब्रह्मचारीका अनुसार एक महिनासम्म चलेको महामहोत्सवमा करिब ३३ लाख भक्तजनले दर्शन गरेका छन्।महामहोत्सवमा १ लाख २४ हजार सवारी भित्रिएको उहाँले बताउनुभयो।

उहाँका अनुसार १ लाख ९८ हजार निशुल्क भोजन र ९३ हजार निशुल्क पानी वितरण गरिएको थियो।

स्कन्द पुराण र वराह पुराणमा समेत उल्लेखित नृसिंहधाम भगवान् नृसिंहदेव प्रकट भई दिव्य लीला गरेको पवित्र भूमिका रूपमा परिचित रहेको उल्लेख गर्दै उहाँले परापूर्वकालदेखि यस क्षेत्रमा धार्मिक महोत्सवहरू सञ्चालन हुँदै आएको बताउनुभयो।

नृसिंहधाम विकास समितिका अध्यक्ष भूमी कँडेलले सबै क्षेत्रको साथ, सहयोग र सहभागिताका कारण महामहोत्सव सफलतापूर्वक सम्पन्न भएको बताउनुभयो।

कार्यक्रममा केही कमी-कमजोरी भएको स्वीकार गर्दै उहाँले ती अनुभवलाई सिकाइका रूपमा ग्रहण गरी आगामी दिनमा अझ व्यवस्थित र प्रभावकारी रूपमा महोत्सव सञ्चालन गरिने बताउनुभयो।

पत्रकार सम्मेलनमा त्रिपुरासुन्दरी गाउँपालिका अध्यक्ष राजु उप्रेतीले नृसिंहधामले गाउँपालिकालाई राष्ट्रिय तथा अन्तर्राष्ट्रिय स्तरमा परिचित गराउन महत्वपूर्ण भूमिका खेलेको बताउनुभयो।

नेपालसहित विभिन्न मुलुकबाट भक्तजनहरू दर्शनका लागि आएको उल्लेख गर्दै उनले धार्मिक पर्यटनको विकाससँगै स्थानीय आर्थिक, सामाजिक तथा सांस्कृतिक क्षेत्रमा समेत सकारात्मक प्रभाव परेको बताउनुभयो।

नृसिंहधामको संरक्षण, संवर्द्धन र विकासका लागि गाउँपालिकाले हरेक वर्ष बजेट विनियोजन गर्दै आवश्यक सहयोगलाई निरन्तरता दिने उनले प्रतिबद्धता व्यक्त गर्नुभयो।

हेर्नुहोस् एक महिनासम्मको आय विवरण 👇️👇️

यस्तो छ,कार्यक्रमको खर्च विवरण, बचत र आम्दानी 👇️👇️