धादिङको पालिका स्तरीय भलिबल : पुरुष तर्फ खनियावासको सिङ्गङ एकता र महिलातर्फ नीलकण्ठ प्रथम

अडियोमा सुन्नुहोस

धादिङ । धादिङ जिल्ला स्तरीय महिला/पुरुष भलिबल प्रतियोगिता सकिएको छ ।

जिल्ला भलिबल संघ धादिङले धादिङ जिल्ला भलिबल टिमका पूर्व कप्तान स्व.मनोज श्रेष्ठको स्मृतिमा आयोजना गरेको महिला/पुरुष भलिबल प्रतियोगिता अन्तरगत पुरुष तर्फ खनियावास गाउँपालिकाको सिङ्गङ एकता समाज प्रथम भएको छ।

सदरमुकाम धादिङबेशीस्थित कभर्डहल सँगैको खेलमैदानमा आईतबार भएको फाईनल खेलमा रुवीभ्याली गाउँपालिकालाई ३–० को सोझो सेटमा हराउदै खनियाबास गाउँपालिकाको सिङ्गङ एकता समाज प्रथम भएको हो ।

२५–२०, २५–२१ र २५–२० को सेटमा सिङ्गङ एकता समाजले खेल जितेको हो।

क्वाटरफाइनल खेलमा खनियाबास गाउँपालिकाको टिमलाई नै पराजित गर्दै सिङ्गङ एकता सेमिफाइनल गएको थियो।

सेमिफाइनल खेलमा सिङ्गङ एकताले गंगाजमुना गाउँपालिकालाई र रुवीभ्याली गाउँपालिकाले सिद्धलेक गाउँपालिकाको टिमलाई हराएर फाइनलमा पुगेका थिए ।

प्रथम भएकोे सिङ्गङले नगद १ लाख १ हजार १११ सहित ट्रफि,मेडल र प्रमाणपत्र, दोस्रो भएको रुवीभ्यालीले नगद ५५ हजार ५५५ र सेमिफाइनल पुगेका रुवीभ्याली र सिद्धलेकले २०/२० हजारसहित ट्रफि,मेडल र प्रमाणपत्र पाएका छन् ।

यसैगरी महिला तर्फ नीलकण्ठ नगरपालिका प्रथम भएको छ ।

शनिबार भएको फाईनल खेलमा सिद्धलेक गाउँपालिकालाई ३–१ को सेटमा हराउदै नीलकण्ठ प्रथम भएको हो।

नीलकण्ठले सिद्धलेकलाई २५–१७, २०–२५, २५–१८ र २५–१९ मा पराजित गरेको थियो।

सेमिफाइनलमा नीलकण्ठले ज्वालामुखी गाउँपालिकालाई र सिद्धलेक गाउँपालिकाले बेनिघाट रोराङ गाउँपालिकाको टिमलाई हराएर फाइनलमा पुगेका थिए ।

महिला तर्फ प्रथम भएकोे नीलकण्ठले नगद ५५ हजार ५५५ सहित ट्रफि,मेडल र प्रमाणपत्र, दोस्रो भएको सिद्धलेकले नगद ३० हजार ३३० र सेमिफाइनलमा पुगेका ज्वालामुखी बेनिघाट रोराङले १५/१५ हजार सहित ट्रफि,मेडल र प्रमाणपत्र पाएका छन्।

साथै प्रतियोगिताको पुरुष तर्फ सर्वोउत्कृष्ट खेलाडी खनियाबास सिङ्गङका योहाङ तामाङ, उत्कृष्ट स्पाईकर रुवी भ्यालीका प्रकाश तामाङ,उत्कृष्ट मिडिल ब्लकर खनियाबास सिङ्गङका सुजन तामाङ, उत्कृष्ट सेटर रुवी भ्यालीका उपेन्द्र तामाङ, उत्कृष्ट डिफेन्डर रुवी भ्यालीका कोबहादुर तामाङ, उत्कष्ट सर्भर खनियाबास सिङ्गङका दिलिप तामाङ र उत्कृष्ट कोचमा खनियाबास सिङ्गङका जसबहादुर तामाङ घोषित हुनुभएको छ ।

महिला तर्फ भने सर्वोउत्कृष्ट खेलाडी नीलकण्ठकी वाल्मीकी आचार्य, उत्कृष्ट सेटर नीलकण्ठकी जमुना गुरुङ, उत्कृष्ट स्पाईकर सिद्धलेककी रेविका तामाङ, उत्कृष्ट लिब्रो नीलकण्ठकी पार्वती बराम, उत्कष्ट सर्भर सिद्धलेककी प्रतिक्षा थापामगर र उत्कृष्ट कोचमा नीलकण्ठका चेतलाल तामाङ घोषित हुनुभएको प्रतियोगिताका रेफ्री संयोजक सोम बहादुर श्रेष्ठले जानकारी दिनुभयो । खेलाडीहरुले ट्रफी, मेडल र प्रमाणपत्र प्राप्त गरेका छन् ।

मंसिर ८ गतेदेखी सुरु भएको प्रतियोगितामा पुरुष तर्फ ११ टिम र महिलातर्फ ८ टिम सहभागी थिए ।

गंगाजमुना गाउँपालिका–४,गुम्दी घर भएका धादिङ भलिबल टिमका कप्तान श्रेष्ठको ०८० कात्तिक ९ गते निधन भएको थियो।

टिपटप हेल्प नेपालबाट प्रधानमन्त्री कप एनभीए समेत खेलेका श्रेष्ठको कप्तानीमा धादिङले बागमती प्रदेश स्तरिय प्रतियोगिता समेत जितेको थियो ।

उनैको सम्झनामा स्मृति कप आयोजना गरिएको जिल्ला भलिबल संघ धादिङका अध्यक्ष अमृत गुरुङ (तिलक) ले बागमती कलमलाई बताउनुभयो ।

यस प्रतियोगिताबाट महिला/पुरुष दुबै तर्फ खेलाडी छनौट गरी जिल्ला स्तरिय टिम छनौट गरिने उहाँको भनाई छ।