विद्यालय र समुदायबीचको सहकार्य सुदृढ बनाउन शैक्षिक सरोकारवालालाई कार्यशाला

बिदाङ । बेनीघाट रोराङ्ग गाउँपालिका वडा नं. ८ को कालिका माध्यमिक बिद्यालयमा भएको अभिभावक–शिक्षक संघ र शैक्षिक सरोकारवालाको दुईदिने कार्यशाला सम्पन्न भएको छ ।

विद्यालयमा गुणस्तरीय शिक्षा, बाल अधिकार, र शैक्षिक वातावरण सुधार गर्न अभिभावक–शिक्षक संघ, विद्यालय व्यवस्थापन समिति र विभिन्न शैक्षिक सरोकारवालाबीच सहकार्यलाई सुदृढ पार्ने उद्देश्यले असोज ६ र ७ गते दुईदिने कार्यशाला सञ्चालन गरिएको फिल्ड कार्यक्रम अधिकृत सुमित्रा चेपाङले जानकारी दिनुभयो ।

चाइल्ड फण्ड जापानको साझेदारीमा प्रयास नेपाल धादिङले बेनिघाटरोराङ गाउँपालिकाको समन्वयमा संचालन गरेको शिक्षामा पहुँच सुनिश्चितता परियोजना अन्तरगत भएको कार्यशालामा ३४ जनाको सहभागी रहेको थियोे ।

कार्यशालाको सहजीकरण प्रयास नेपाल धादिङका कार्यकारी निर्देशक दामोदर अर्यालले गर्नुभएको थियो।

कार्यक्रममा वडा अध्यक्ष राजकुमार श्रेष्ठले विद्यालय र समुदायको बीचमा सहकार्यको महत्व र यसले बालबालिकाको शिक्षा र विकासमा पार्ने सकारात्मक प्रभावको बारेमा चर्चा गर्नुभयो।

कार्यक्रममा प्रयास नेपालका कार्यकारी निर्देशक दामोदर अर्यालले विद्यालय व्यवस्थापनमा सरोकारवालाहरूको भूमिका र उत्तरदायित्वमाथि गहन प्रस्तुति दिनुभयो।

उहाँले विद्यालय र समुदायबीचको सहकार्यलाई सुदृढ बनाउन, बाल–अधिकारलाई प्रोत्साहन गर्न, र शिक्षा क्षेत्र सुधारका लागि पारदर्शिता र उत्तरदायित्वको आवश्यकता रहेकोमा जोड दिनुभयो।

उहाँले भन्नुभयो,“विद्यालय र समुदायको बीचमा एक मजबूत सम्बन्ध स्थापित गर्नु आवश्यक छ, जसले गर्दा बालबालिकाको शैक्षिक विकासमा मद्दत गर्न सक्छ।”

अर्यालको सहजिकरणले सहभागीहरूलाई सोच्न र संवाद गर्न प्रेरित गरेको प्रधानाध्यापक इश्वरबाबु रेग्मीलेले बताउनुभयो ।

विद्यालयका प्रधानाध्यापक ईश्वर बाबु रेग्मी र परियोजना प्रबन्धक केशव सिग्देलले अभिभावक–शिक्षक संघ र विद्यालय व्यवस्थापन समितिको महत्वको बारेमा सहजिकरण गर्नु भएको थियोे ।

सहभागीहरूले विद्यालय सुधारका लागि विविध कार्ययोजनाहरू निर्माण गरि कार्यान्वयन गर्ने प्रतिबद्धता व्यक्त गरेका छन् ।

कार्यशालाले शिक्षण गुणस्तर, बाल–अनुकूल वातावरण, र बालबालिकाको सुरक्षा सुनिश्चित गर्न अभिभावक र शिक्षकहरू बीचको समन्वयमा ध्यान दिनु पर्ने,विद्यालय व्यवस्थापन समितिका सदस्यहरूलाई शैक्षिक पारदर्शिता, जवाफदेहिता र सेवा प्रवाहका लागि जिम्मेवार हुनुपर्ने,सहभागीहरूमा रहेको विविधता र तिनीहरूको अनुभवले कार्यशालामा समृद्धि ल्याएको बताएका छन् ।

सबैले एक अर्काबाट सिक्न र विचार आदानप्रदानले अभिभावक–शिक्षक संघ र विद्यालय व्यवस्थापन समिति सहित विद्यालय सुधारका लागि सबै सरोकारवालाहरूको सक्रिय सहभागिता, विद्यालय र समुदायको सहकार्यले बालबालिकाको उज्ज्वल भविष्य निर्माणमा ठोस योगदान पुर्याउनेमा सरोकारवालाहरुले विश्वास व्यक्त गरेका फिल्ड कार्यक्रम अधिकृत सुमित्रा चेपाङले जानकारी दिनुभयो ।