तमूस्यो ह्युल छोंज धी गुरूङ महिलाको केन्द्रिय पार्षद सभा धादिङबेसीमा हुने

धादिङ। गुरुङ महिलाहरुको संगठन तमूस्यो ह्युल छोंज धी गुरूङ महिला राष्ट्रिय परिषद्को केन्द्रिय पार्षद सभा सदरमुकाम धादिङबेसीमा हुने भएको छ ।

आउँदो असोज ५ गते धादिङबेसीमा हुने पार्षद सभामा नेपालको ४७ जिल्लाबाट १ सय ८० जना प्रतिनिधि सहभागी रहने तमूस्यो ह्युल छोंज धी गुरूङ महिला राष्ट्रिय परिषद जिल्ला कार्य समिति धादिङकी अध्यक्ष जमुना तमुस्योले जानकारी दिनुभयो ।

तमूस्यो ह्युल छोंज धी गुरूङ महिला राष्ट्रिय परिषद्को केन्द्रिय समितिको आयोजना र जिल्ला कार्य समिति धादिङको व्यवस्थापनमा हुन लागेको पार्षद सभाले विधान संसोधन, आगामी कार्य योजनाका विषयमा निर्णय गर्ने अध्यक्ष तमूस्योले बताउनुभयो ।

पार्षद सभा सम्पन्न गर्नको लागि विभिन्न समितिहरु बनाएर तयारीलाई तिब्रता पारिएको उहाँको भनाई छ ।

तमूस्यो ह्युल छोंज धी गुरूङ महिला राष्ट्रिय परिषद जिल्ला कार्य समिति धादिङकी कोषाध्यक्ष निरु तमूस्योको संयोजकत्वमा आर्थिक समिति तयार गरेको छ ।

यस्तै अतिथि सत्कार समिति, भान्सा व्यवस्थापन, प्रचार प्रसार लगायतका समिति उपसमितिहरु बनाएर सोही अनुसारको काम भइरहेको अध्यक्ष जमुना तमुस्योले बताउनुभयो ।